Am zwöi isch es im grosse Saal vor Hope And Life Church Ämmitau los gange.
Es isch e moderni Kirche wo gärn änglischi Näme bruucht für d'Sache oder Rüüm oder Lüt...Leiter heisse Leader, Lobprys heisst Worship, Grosse Saal heisst Hall, KUW heisst School, äbe Konf. heisst Graduation.
Es sy sächs Modis u zwo Giele gsy wo die School bsuecht hei. Während 16 Mittwuchnamis im letschte Jahr hei si Unterricht gha, die hei Teachings gheisse. Si sy zäme i McDonalds, go bowle, go spaziere u vieles meh. So wie's u de viele Fötteli i de Clips, het's äuä no gfägt! Di Junge hei ganz viu Sache ufgnoh u üs Vorgfüehrt. Si hei üs verzellt, wo dass es se häre verschlaat sygs i ne Lehr oder a ne wytteri Schueu. Myni wott go Lastwägele. Der Pfarrer, Pastor het e kurzi Predig übere Abraham gha. D'Konfirmande hei üs o no danket u hei im jugendleche Yfer da vielecht s'Einte oder s'Andere z'viu erwähnt oder sogar vergässe...Ja, mir hei viu glachet u d'Zyt isch schnäll ume gsy.
Aaschliessend, sy mir is Mamma Lucia go ässe. Es isch sehr fein gsy! I ha's mit u ohni Suurstoff d'Inne u d'Usse mit Föttele, bis fasch am Siebni usghalte.
Ja i ha's gnosse dörfe derby z'sy!