Peter isch bis am Sunntig da gsy. Är isch früecher Hei gange, wüeu ihn sy Brueder isch cho bsueche. S'Usstyge het nid schnäll gnueg chönne sy, so dass är sogar syni meh als es halbs Dotze Osterhase im Outo het vergässe. Mir hei se ihm natürlech müesse bringe. Da s'Gester gägen Abend schön isch worde, het der Kurt d'Outonummereschilder zum Cabrio gwächslet. Mir sy also guet ypackt is Bärau gfahre und i ha im Outo mit de Hase gwartet. Peter het aber wägem Böögg ke Zyt gfunde, se z'hole. Der Kurt het se ihm müesse bringe...
I bi froh gsy han ig, ohne zusätzlechi Schmärzmedis müesse z'näh, die Fahrt im Cabrio guet chönne z'überstah u sogar Fröid dranne z'ha. Es isch würklech schön gsy über s'Eggiwil, d'Linde, Grosshöchstette, Hei gfahre z'wärde. Ja, i ha's richtig gnosse!
Hüt plage mi Schmärzen ir linke Schultere u unger drah. Es het dört wachsendi Tumore wo bis im ganzen Arm weh tüeh...S'Blöden isch, dass es mir o bym Liege weh tuet.
Chrigis Psalm
Herr, wenn hört das ändlech uf?
I ha doch i mym Läbe gnueg Schmärze gha!
Wenn griffsch Du ändlech yy?
I weiss, dass es für Di kes Ding wär yyz'gryyffe!
Tue doch öppis!
Zeig Dyni Macht!
Hol mi us dere Schmärzspirale use!
Es frisst mi uf!
Ig weiss, dass Du läbsch!
Ig weiss, dass Du der einzig bisch wo mir cha hälfe.
Ig weiss, dass Du no Hüt chasch Wunder tueh!
Zeig mir doch uf weli Syte as es geit, öb es Wunder Hie oder ersch bi Dir!
Zeig mir Di Wille!