Am Donnstig isch no nid viel gloffe. D'Spitex chunnt ja zwöi Mau täglech zu mir u jede zwöitet Tag tüe si bym Pleurix Wasser us em Lungefäll ablah. Bis jetz isch meistens fasch 700ml usecho.
Am Frittig hei mir fei öppis los gha. R. u H. sy nach ihrem Gottesdienscht cho Zmittag ässe. D'Schwöschter vom Peter isch zum Kaffi cho. Der Peter isch glücklech gsy drüber. D'M. u der R. si zum Znacht cho. Si sy de grad mit em Kurt u em Peter i LightUp Gottesdienscht uf Konufinge. Dört isch Gebät aabotte worde. Der Peter isch häre u het für mi um Gebät bittet u bättet.
Der Samstig isch ruhig verloffe u am Abe sy d'U. u der A. cho Znacht ässe. Si hei e feini sälbergmachti Züpfe u Wyy bracht. Es git so Beziehige; de gseht me sech Monate lang nid u we me zämen isch chunnt's eim vor als wär me gar nid usenand...
Der Peter het am Kurt gseit, si müessi de no am Samstig mit mir bätte, dass ig der Sunndig guet überstöng. Är het gwüsst, dass mir denn yglade sygen uf Wilderswil go fein ässe u das wöu är de mit mir zäme. Wo d'Spitex am Sunndig Lungeflüssigkeit het wöuen ablah, isch gar kei Tropfe cho. Es isch mir wohl gsy derby. I ha o d'Fahrt uf Wilderswil guet überstande. Dört han ig es Parterre Zimmer übercho won ig ha dörfe go liege u das han ig einisch e Stund u s'anger Mal, e Halbi. S'Ässe isch wi jedesmal vorzüglech fein gsy. Mir sy fei mängs gsy am Tisch sogar d'Yvonne u der Richie hei chönne häre sitze. I ha bis am 16.30 Uhr düreghalte u bi denn K.O. gsy. Mir sy du Hei gfahre. Ig ha fasch geng gschlafe...
Am Mändig isch der H. cho Zmorgen ässe. Syni Frou isch vor Kurzem gstorbe. Är isch syt mängem Jahr üse Küngeli-Lieferant. Är bringt aber meistens viu Meh als dä. Das Mau het Är e ganze Sack voll Oster-Schoggi-Eili u ne feine sälbergmachte Kirschikueche bracht. Dä isch so fein gsy! H. isch am Füfi uuf für dä z'mache. um e Mittag um isch d'Spitex no Mau cho. Es isch ne nid wohl gsy derby, dass bym Ablah nüt cho isch. Si hei du gspüehlt u da isch e chlyne Eiwysspfropfe wäg und es sy 700ml Flüssigkeit usecho. Am Namittag sy mir i Landblick. Dört hei mir üs am 14.30 Uhr mit der Grandmaman troffe. Der Jonathan, d'Eli u der Miggi sy vohär scho dört gsy u gly Mau no mit em Jamie zäme gange. Es isch di ganzi Familie Thür da gsy, Mattis u mir. Das git grad 10 Lüt. Das het ar Grandmaman gfalle! S'Brutalen isch, dass si's am Abe won ig ihren aaglütte ha, z'ersch nümme gwüsst het. Si het gmeint, es syg e längwylige Sunndig gsy. Nume der Mätthi heig si am Abe kurz bsuecht. Won ig du nacheborrt ha u Lüt ha afe erwähne, isch es zrüggcho...Das macht ihre im Momänt Müeh! Mir o!
Am Vieri isch üsne Junge i Sinn cho, si chönnte bi üs d'Usse brätle u d'Ynnen ässe. Si hei alles mitbracht. Es sy fasch alli da gsy u das het mi gfröit.