Syt ig Daheime bi schlafen ig guet. Im Spital bin ig viel erwachet, we aube d'Nachtwach mit der Taschelampe zwar uf de Zähiespitz ynecho isch...I ha geng no dä Muetterschlaf wo ab jedem Muggesuure oder Flöigeghuescht erwachet...Da Hie isch würklech Rueh! D'Suurstoffpumpi isch im 1. Stock u mir tüeh d'Türe zue.
Wäg myre eisyttige Frisur wo me uf em Fötteli gseht isch z'erkläre, dass es uf eire Syte gschnitten isch u uf der Andere d'Chemo-Chruseli erhalte sy...
Geschter han ig es mega Programm gha. Früecher hät ig das nid e Mal erwähnt...Der Kurt het mi am Drüü abgholt für uf Burgdorf zur C. i d'Osteopathie. Si het mir ume chly Linderig vo de Schmärze bracht.
Der Kurt het vorhär der Pesche gholt gha. Si Rollator isch kaputt gsy u drum si sy i dere Zyt zäme is Orthoteam Burgdorf ne go la flicke u no grad zwöi Paar Schueh zum Flicke gäh. Der Kurt isch mi cho hole u mir hei de no zäme mit em Pesche es Paar Sandale bstellt. Die göh mir de nach der Ostere go probeloufe. E nöie Rollator het er o no z'guet. Dä luege mir de o grad aa u chöi ne viellecht de grad mitnäh... Der Pesche isch ume bi üs i de Ferie u das bis am 16. April. Är isch ja rächt sälbständig und mir tüeh enang Gsellschaft leischte. Är gniesst's viel dörfe Fernseh z'luege und ig bi so nid alllei.
Geschter hei grad zwöi vo üsne Änkle Geburtstag gha. D'Jael isch siebni worde u der Even vieri. Es geit e so schnäll u scho si sy gross! Mir sy vo Burgdorf uus uf Grosshöchstetten a d'Geburiparty vom Even. Es sy vieli da gsy, Verwandti u Nachbare. I ha's tatsächlech e Halbstund usghalte u bi so froh gsy het mi der Kurt Hei gfahre. I bi total kaputt gsy! Hüt muess ig büesse...
I ha dür die bi der Verchläbig verschleppte Metastase e grosse Tumor am linke Lungeflügu wo mir jetz grad rächt weh tuet. I ha jetz aber syder dass ig Daheime bi sälte Resärvemedis bruucht. Hüt am Nami nimen ig aber 30 Tröpfli Morphium, de lugget's de ume. I bi aber würklech bis jetz e so mit de Schmärzmedis guet gfahre u weiss, dass ig die darf näh. Also, i gah jetz ume go liege...