Am Mittwuch 22. März het mir der Pneumolog e Pleurix yybout. Das isch es System wo me cha vom Pleuraerguss (Wasser uf der Lunge) sälber ablaah. Da darf me nid meh als 1,5 Litter uf's Mal uselah wüu süsch d'Lunge cha zämeklappe...Wenn sech d'Lunge nach em "Ablaah" wieder "entfalltet", de tuet's weh!
D'Flavia het mi am Zischtig am 28.3. dörfe mit Hei näh. I ha drum kes Ketamin meh und es geit bis jetze o vo de Schmärze här guet. I ha das Ketamin lah stoppe u ha wäge däm ke Infusion, ke PIC, ke Port u o ke Schmärzpumpi meh. Was mi sowiso komisch düecht isch, dass mir di linki Schultere vo denn aa het afa weh tue wo der PIC isch d'Ynne gsy. I ha fasch e chly der Verdacht als wär dä nid richtig gläge und das Ketamin para gloffen isch. Das würd heisse, dass das Gift i mys Gwäb ynen isch u die drum weh tuet...
D'Spitex chunnt 2x täglech zu mir Hei. Si tuet mir einisch ir Wuche d'Medis i so ne Medikamäntedosierer für 7 Täg richte. Si tuet yneluege u fragt wi's mir geit, öb's mir schlächt isch, öb ig uf's Hüsli syg, was si mir chönni mache...Si tuet mir meischtens der Äcke u der Rügge salbe. Jede zwöite Morge tuet si mir bym Pleurix Flüssigkeit uselah. Am Afang sy um ei Litter usecho. Hüt sy's nume no 600ml gsy. Geschter am Namittag han ig's dörfe gniesse: d'D. het mir e wohltueendi Fuesspfleg verpasst. Am Abe hei mir zum Znacht liebe Bsuech gha. Es het feini Pizzoccheri u Entrecôte Café de Paris ggäh. I ha glych guet gschlafe. Das tuen ig sowiso hie sehr guet!