I bi also sit em Zischtig im Burgdorfer Spital. Si luege mir guet. I bi im 2. Stock u gseh schön uf dä Platz vor em Ygang wo d'Patiänte us u yglade wärde.
I dere Wuche won ig da bi han ig vieli gseh yy und uus gah. Der Kurt het o frei übercho für am ne Rapport cho mit z'rede. Es isch guet u wichtig wien är ybezoge wird. I bi so froh, dass är mir so guet luegt.
I bi jetz grad mys Mammeli am ufmuntere, ihres Gnuusch im obere Fadechörbli lah z'sy u sech a däm fröie wo hie no geit. Ihre Chopf syg doch voll u es syg haut schwierig no meh wöll u sölle yne z'buttere. I muess ihre halt scho erkläre, dass si darf vergässe u dass z'vergässe nüt mit Dümmi z'tüeh heigi. Si isch mi mit der Sarah zäme cho bsueche. Si het's am Tag druf nümm gwüsst. Drum han ig Fötteli gmacht, de cha me das fürenäh...