Am Mändigabe sy der Kurt u ig mit em Kusi u ar Tiziana i Kino Worb go ne ganz e schöne Film go luege. Dä heisst: Ein Mann namens Otto O-T-T-O.
I ha ändlech am Zischtigmorge e Termin byr Ärztin für Palliativ Pfleg übercho. Nach einige Sätz sy mir übery cho, dass es äuä am Beschte wäri, wenn ig grad würdi in Burgdorf blybe. Es sy so viel Faktore wo derfür sprächi, dass si mi bhalte. I ha sooo Müeh gha mit em Schnuufe. I ha tatsächlech scho am Namittag dörfen es CT mache, eis mit Kontrastmittel. Es isch da usecho, dass ig ume Wasser uf der Lunge ha. Also hei si mir Gester 1,5 Litter Flüssigkeit us em rächte Lungeflügu zoge. Es het meh Flüssigkeit drinne, isch aber sövu wi si dörfe uselah u nid meh. D'Lunge würdi süsch zämegheie u hätti Müei sech wieder z'entfalte. Es isch ja das wo so weh tuet, wenn si sech wieder entfaltet. Der link Lungeflügu isch ja scho verkläbt, dört git's ke Flüssigkeit meh. I bi am überlege, was ig wott. Es git d'Option vo re Thoraxdainage, ig muess es aber no gnau aaluege...
Sorry, s'isch e chly lang gange...