Wo der Kurt mit de Giele Hei cho isch het das scho aagfange, mit der Atemnot. I ha's wäggsteckt mit der Begründig, es sygi halt so, i müess stärcher wärde. Bi jeder Bewegigsänderig han ig vom gröbschte Atemnot gha u jedes Ufstah isch vom Schnuufe här e Tortur gsy. D'Buebe sy Hei u mir sy D'Atemnöt blybe.
Am Mändigmorge isch es ume so schlimm gsy, dass ig sogar ha wölle stärbe. Der David het Geburi gha u isch vor em Schaffe no verby cho. Für my Mage isch es äuä no chly Früeh gsy. I ha du der Kaffi samt fei e chly viu Gallesaft müesse gögge. Zum Glück han ig d'Medis no nid gnoh gha. Es isch so dass s'Ynäh vo däm Medi o scho ne Tortur gsy isch. Won ig du der Palliativspitex aaglütte ha u die mir empfohle het s'Medi abz'setze u der Schmärzärztin aaz'lütte, het's mi beruhigt. I ha du am Abe kes meh gnoh. Am Morge han ig's scho gmerkt, dass d'Atemnot het afah nah lah...
Am Zischtig isch d'Sarah cho s'Zmittag ässe. s'Baby drückt ihre uf en Ischias Närv. Das tuet Weeehhh!!! Es isch am Kurt si letscht Tag bir Bläuer Möbelfabrik AG. Am 1. März 2023 het er bi der Bettwaren Fabrik www.kyburz-bfb.ch aagfange. Das isch in Kersatz, zwüsche Bälp u Bärn. Er het guet gstartet!
Am Mittwuch isch mir en Anekdote passiert: Es het mi scho länger bim Bisle brönnt, drum han ig mi online, bir Apithek zum ne Blasenentzündigstest aagmäudet. So früeh wi möglech! Si hei mir aber, e Stund früecher aaglüttet u mir gseit, dass si i mym Fall gar nüt machi. Ig söll diräkt zum Dokter. I ha du, brav wien ig bi, bim Huusarzt aaglütte. Dört het's gheisse, der Dr. Feller sygi i de Skiferie u si syge dermassen im Seich, i söll mi bym Medphone mälde.
Am Mittwuch han ig der ganz Tag meh oder weniger dööset u trunke u wieder dööset. Mi Bsuech wo am Nami hät sölle cho, het kurzspitz uf Paris dörfe u das derdür vergässe, dass mir abgmacht hei gha. Das wär mir genau glych passiert. I hät das o vergässe...Zum Glück git's WhatsApp! Da hei mir's gly klärt gha.
Gester het mi d'Palliativ Spitex Frou bsuecht. Si het no öpper bi sech gha. Si het mi ermuetiget dä Termin bir Ärztin byz'bhalte u mit ihre grad d'Medis nöi aaz'luege.Ja, i bi gspannt wi sech das entwicklet het. Uf all Fäll weiss ig jetz, dass ig s'Fentanyl o nid über d'Schlymhüt cha ufnäh.
Hüt am Morge isch d'R. mir umen eis cho Znüni bringe. Es het so guet tah, dä Kurzbsuech. Merci!
Du darfsch also, mi cho bsueche. Eifach vohär, es Telefon u wenn ig da bif, es churzes Bsüechli...