I ha scho länger s'Gfüehl, d'Medis nützi nümme das wo si sötte. D'Schmärz-Ärztin het mir telefonisch stärcheri verschrybe. I ha jetz doch hüt am Morge dermit aagfange. Vorhär han ig mi nid gwagt dä Wächsu vorz'näh.
Am Mittwuchnami bin ig go d'Mamie hole u mit ihre is Mosaik.(es sött ja jetz ikut heisse...für mi blybt's haut s’Mosaik)I bi froh gsy isch mi Schatz u Taxi Chauffeur nach 1.5 Stunde cho u mir si Hei. Es het mir alles weh tah...
Daheime het mi Maa scho aagfange Mussaka choche. Das isch en Art e griechischi Lasagne. Statt Teigblätter bruucht me Aubergine u die tuet me vorhär der längswäg i 5mm dicke Tranche, einzu mit Salz im 90 Grad warme Ofe e viertu Stund lang, vom bittere Byygschmack befreie. S'Hackfleisch isch nach Rezäpt am beste Lamm. Das cha me o scho am Vortag brätle.
Am Donnstigmorge het mi d'B. bsuecht. Ja, mir kenne üs jetz doch o scho laaang u s'fröit mi geng se z'gseh. Isch doch üse David mit ihrer Tochter i d'Schuel u die isch doch Mal Miss Bern-Ost gsy...
Am Mittag isch d'S. bi üs zum Mussaka ässen yglade gsy. Si tuet aube am Kurt hälfe der Jahresbricht vor BPlus Konolfinge schrybe. Am Namittag hei mir wölle go bade. Si hei dört grad Solarpanels Montiert u s'Bad isch derwäge zue gsy. Mir sy du im Thalsaagibeizli eis go zieh.
Am Frittig han ig am Nami u Abe es Marathonporgramm gha. Z'ersch bin ig zur Psychoonkologin, nächär zur Osteopathin u aaschliessend a s'Geburtstagsfestli vor E. Si het es Sächsi gfasst. Es isch e ganz schöne Abe gsy. Us lutter gniesse han ig vergässe myni Medi z'näh. I ha fei e Krise gha... Nachdäm ig d'Medis z'ersch erbroche ha u ne Pouse ygleit ha, sy d'Täbis du d'ynne blybe und ig ha chönne schlafe.
Geschter si mir bi den Eltere vor Sabrina zum Zmittag yglade gsy. Es isch ganz fein gsy, die Quiche u der Nüssler Salat. Zum Dessert, het's e Tranche Cassata ggäh. Ig bi nächär gärn ume go liege.
Hüt bin ig nid mit i Gottesdienst. Der Kurt het im Louf vom GD d'Buebe übernoh. Si sy gäge di zwöi Hei cho. Chuum si sy da gsy het der eint vo de Buebe, us lutter längizitti müesse gögge. Er sygi ir Hängematte gschlafe, äbe heig er nid gschlafe, drum heig är scho am Morge müesse gögge.
Dä schlat am Poppeli nache wäg der Längizzitti u mir wäg em gögge... äben üse Änkel.
I bi froh han ig gwartet mit em Wächsu...