Mir hei mit üsne Kinder abgmacht, am Mändigabe umen eis i Alpeblick go Fondüe Chinoise ässe. Der Kurt u ig hei grad chly länger buechet. Vom Samstig bis am Zischtig. Es isch am Wuchenändi vom Wätter här nid so schön gsy. Mir hei's dennoch zäme gnosse. Am Mändigabe han ig fröhlech zwüsche myne Kinder am Tisch Platz gno u mi mega uf das gwaltige Fondüe gfröit. Plötzlech, nach em Salat u paar Möckli Fleisch, isch das mir schlächt worde. I bi übere is Zimmer u ha alles wieder umeggäh wo i mym Buuch inne isch gsy. Bis Hüt am Morge het's nid wölle ufhöre, obwohl ig am Zischtig e Termin byr C. übercho ha. Es het grad e viertu Stund bevor der Kurt aaglütte het, öpper kurzfrischtig abgseit. Mir sy du diräkt vo Wilderswil uf Burgdorf gfahre. Mys Zwärchfäll het ke Wank meh gmacht. Es het mir der Mage richtig ygklemmt u blockiert gha. Es isch mir i de letschte Täg würklech e so eländ gsy, dass ig am liebschte nümm da wär gsy. I cha Gott sei Dank hüt am Nami o wieder uf Burgdorf zur C. Si cha mir de no löse, was z'lösen isch.