I der letschte Wuche isch bi mir nid sehr viel gloffe. Myner Kräft löh's nümme so zue...I muess viel meh yteile...
Am Frittig isch doch öppis "ussergwöhnlechs" gsy. Es Interview zum MPD (mobiler PalliativDienst)Emmental-Oberaargau vor WOZ: Wuchezyttig o vor Region Emmental-Oberaargau het i myre Stube stattgfunde. Der Bricht chunnt öppen i re Wuchen use. Ja, es isch e gueti Sach. I füehle mi guet begleitet u weiss wo häregah, wenn ig nümme wyter weiss...I cha zu jeder Tages u Nachts Zyt aalütte u mir luege's zämen aa, wo dass ig häre söll, ob zum Huusarzt, zur Spitalärztin oder sogar i Notfall...Bis jetz het mi immer di glyychi Pflegefachfrou bsuecht, mit Zuesatzusbildig in Palliativcare. Am Afang isch si meh cho. Jetz tuet si mir öppen all zwo Wuchen aalütte u je nach Bedarf, chunnt si mi cho bsueche. Es tuet mir aube guet mit ihre z'rede u si schickt mi de auben einisch zur Ärztin...Dört isch d'Wartezy eh mindestens zwo Wuche.
I bi i de letschte Wuchene o zur Psychoonkologin gange. Die tuet myni ganzi Familie begleite: der Kurt u üsi vier Kinder. Ja, o si het gfunde: e so viel Veränderig uf's Mal i eire Familie hei si no gar nie gseh...Si sygi beydruckt mitz'erläbe, dass alli so schnäll e Stell gfunde heige oder en anderi Ufgab: byr Sarah, d'Schwangerschaft. O, wie bin ig Gott dankbar derfür!!!
Die Wuche het "füesslig" aagfange: Am Mändig isch d'D. mir cho ne aagnähmi Pedicure machen u Geschter het d'M. ume "gfüesslet"(e Fuessmassage) o das het guet tah!
Jetz wott ig de umen eis i d'Livenet Pouse...