Am Sunndig sy der Kurt u ig zum Mamie go ne kurze Gottesdienscht fyyre. Jesus seit ja, dört wo zwöi oder drüü i Sym Name zämechömi, dört syg Är derby. Mir hei sogar no s'Abendmahl zäme yygnoh. Das het allne guet tah . Im Momänt hei mir alli Müeh im ne "richtige" Gottesdienscht so lang z'hocke.
Am Mändig het e Fründin vo üs gfragt, öb si u ihre Maa am Abe dörfte bi üs zu ihrem Geburtstag verby cho Aastosse. Das isch für üs en Ehr gsy, mit ihne feins Partybrot u zum Dessert e sälber gmachti Rüebliturte vo ihrem begnadete Maa z'gniesse. I ha das derewäg gnosse, dass mi Mage zmitzt ir Nacht rebeliert het u fasch alles ume zrügg cho isch...
Geschter han ig viu los gha. D'Flavia isch am Zähni cho käffele u het mi nächär grad mitgno u byr Coiffeuse usglade. Der Kurt isch mi nächär cho hole u mir sy byr Sarah zum Zmittag yyglade gsy. Es isch mega fein gsy!
I de letschte Wuche han ig furchbari Schmärze gha, ir rächte Syte. Es het sech aagfüehlt wi ganz starchs Sytestäche, isch aber fasch meh im Rügge gsy als vore. Di zwöiti Schmärzregion isch im Äcke uf der linke Syte, hinger em Schlüssubei gäge s'Schulterblatt. Dört han ig verhärterti Lymphknöte wo uf Knöchen u Bänder drücke u wäge däm di starche Schmärze uslöse. Das het mir d'Ärztin won ig Gester am Namittag bsuecht ha bestätiget. I ha dä Termin scho vor längerer Zyt planet gha.
Ja, es isch 'fängs mängs Tablettli won ig muess schlücke. I muess im Momänt am Morge z'ersch Kieselärde Pulver näh mit chly Wasser oder mit Fruchtsaft plus dä Power 4 You Energy Shot drynne. D'Züpfe oder je nach däm s'Brot tuen ig i das feine Zitronen-Olivenöl tünkle u ässe. Das hilft mir e chly weicher uf's Hüsli chönne z'gah...Der Kurt het jetz sälber es Gmisch gmacht mit feinem griechischem Olivenöl i däm Öldösli plus 20 döTERRA Tropfe dry. Im Tassli näbe draa, han ig mys Lattemacchiato. So, das wär mys Zmorge...Jetz muess ig aber sofort go liege...süsch tuet's mir no meh weh...