Die Socken uf em Bild han ig unger Anderem vo mym Suhn übercho wo druf isch. Zur Wiehnacht hei mir es Wichtel - System ygfüehrt, e so dass jedes Erwachsnigs nume no eis Gschänk muess mache.
Am 28. hei mir auso Bsuech gha. Es si langjährigi Fründe wo immer wieder für üs e Säge si. Mir kenne üs scho so lang, dass mir scho für enang fasch Familie si oder sogar meh.
Am Abe het sech de der Rimas zu üs gsellt. Är isch vo Littoue uf Paris mit syre Tochter u den Änkle go Wiehnacht fyyre. Är seit, dass bi üs sys Sanatorium u syni Chiuche sygi. Hie chönn är schlafe. Är isch du Geschter gäge Hei zue. Der Kurt het ihn so wyt bracht, dass är doch nümm i eim Chutt bis Hei fahrt. Är macht jetz aube in Pole e Halt won är doch paar Stund im ne Hotel geit go liege.
Der Pesche isch am 29. ume mit ere "Biglere" wo ir Cafeteria vom Dahlia Zollbrück freiwillig schaffet zur R. u gägen Aben ume zrügg. Si isch mit ihrne bau Hunderti nach wi vor e wichtigi Bezugsperson vom Pesche.
I weiss nid wie's het chönne passiere...A däm Abe bin ig no im Halbschlaf us em Spitalbett gheit. Myni rächti Syte het blaui Mösen übercho u am nächste Morge han ig Müeh gha us em Bett z'cho. Es chunnt mir vor als hätt's mir e Diskus usegjättet u das uf der Höchi L3-L4. I ha Müeh d'Arme z'lüpfe u der ganz Schulterberych tuet weh.
Am 30. hei mir am Mittag liebe Bsuech gha wo grad Zmittag mitbracht het. Da chunnt mir der erschti Värs vom 133. Psalm i Sinn wo's steit: Siehe, wie gut und wie lieblich ist es, wenn Brüder einträchtig beieinander wohnen.
E spannendi Sach isch es doch gsy, dass der Rimas ohni mit em Pesche es Wort chönne z'rede, mit ihm is Friburgische zu syre Fründin gfahren isch. Der Pesche isch begeisteret zrügg cho.
Am Abe isch der Suhn vo üsem Bsuech vom 28. mit syre Frou cho. Es isch scho faszinierend z'beobachte, wi wunderbar sech e Mönsch cha entwickle. Vor allem, wenn Du ihn vo chly uf u o bi yschnidende Ereignis vo sym Läbe hesch dörfe träffe sowi Konf u Hürat. Das verbindet üs scho enorm u git mir o Chraft wölle wyter z'läbe.
So Fründschafte won ig gspühre, dass ig ihne nid glych bi, löh mi la wyter läbe.
Für mi zellt da üsi Familie no meh...
Vor em Apéro, isch der Stephan mit syre Familie cho apéröle.
Es isch lustig wi i üsere Stube no meh s'Zäntrum vo üsem Läben stattfindet. Da wird gspielt, am Büro gschaffet, uf de "Samo's" ggässe, glachet, grännet, gredt, gschwiege, bättet u vieles meh...
Am Silvester si so settigi Fründe wi obe beschriebe cho...mir hei zäme Tischgrill gmacht. Um di Zwölfe si mir abe mit de "Junge" vom Rüümli go aastosse. Der Pesche het am Donnstig e grooosse Vulkan gkouft gha u dä hei mir am Zwölfi aazündet. Da isch fei d'Poscht ab!
Zum Glück chan ig mi immer wieder zrüggzieh. Nume so han ig's bis so spät usghalte. I bi du gly nächär is Bett.
Am ersch Jäner si mir nach den Achten uuf. Mir hei no gar nid gross möge ässe, der Pesche het glych am zwölfi s'Zmittag übercho. Öppen am haubi zwöi si mir das heisst, der Rimas als Chauffeur, der Peschen u ig, go d'Mamie uflade. Zäme si mir is Bahnhöfli uf Zäziwil go ne Coupe ässe. Dört schaffet d'Schwöschter vom Pesche. D'Eltere si o grad dört gsy. Si hei enang syt u wäge Corona nüm gseh gha. Der Pesche het sich mega gfröit alli wieder eis z'gseh! Nächär hei mir no nes Fährtli gmacht u si no im ne Fäld blybe stecke. Si hei D'Mamie u mi Hei gstellt u si go s'Outo wäsche.
Geschter isch der David mit de Kinder cho u het sech mit em ne Fründ u syre Frou hie troffe. Dä Fründ isch e Zyt lang bi üs yy uns uus. Är het am Hillsong College syni Frou kenne glernt u si sy grad in Oustralie blybe. Si isch e Süd Koreanere. Es isch luschtig gsy zue z'luege wi der Noé se grad adoptiert het...
Am Abe het der Kurt der Pesche ume Hei tah.