Am 22. Dezämber het der Kurt bi der Portugiesin in Zell für nes Dotze Lüt e länge Tisch reserviert. Das het fasch s'ganze Beizli gfüllt. Si het's schön deckt gha u feini Spezialitäte uftischet. I bi uf d'Rächnig cho mit de feine Stockfischchüechli. Es het no Thon- u Rindfleischtäschli ggäh. Bi der Collage gseht me's: der Tisch mit de Lila Serviette... Zum Znacht het si sicher sächs Kilo Fleisch gmacht: Rindsentrecotes, Sparrips, Späck, Schwynsplätzli, verschiedeni Würscht u derzue ihri sälbergmachte Pommes. Der Salat het o nid gfählt. Es het wysse u rote Wy ggäh, Wasser mit u ohni Kohlesüüri u nächär Kaffee u einigi hei no Schnaps gnoh, das het's nid cl, sondern dl-wys ggäh. Es isch o grad am Kurt sys Abschiedsässe gsy, drum hei mir zahlt.
Am 23. hei mir üs still gha. I ha am Füfi no zur C. uf Burgdorf chönne. Si het mir ghulfe wieder grad z'stah. Vo de Schmärze het's mi gang zäme zoge gha. I bi völlig scheps derhär cho...Der Kurt u der Pesche sy i dere Zyt hurti ar R. go nes Bsüechli abstatte.
I ha's jetz grad x-Mal probiert, bi aber nid ynecho, zur Livenet Pouse. Es isch eifach nid gange: :''-(
Vo Burgdorf uus, si mir diräkt i Alpeblick uf Wilderswil gfahre.
Der Pesche u o mir hei bis fasch am Achti gschlafe. Das het guet tah! Nach em feine Zmorge Büffet, si mir uf Interlake go ychoufe. Der Pesche het Hose bruucht u mir hei zäme no im Fontis Lade paar Gschänkli poschtet. Am Abe, hei mir am ne wunderschön gdeckte Tisch d'Stöckli-Huber-Bläuer Wiehnacht gfyyret. Uf der Collage, obe-links...Da mir ersch spät Zmittag ggässe hei gha, isch mi Buuch no voll gsy. I ha's bis zur warme Vorspyys gschafft u ha müesse ufgäh. I ha is Bett müesse. I shaffe's nüm am Abe, e siebe-Gänger z'ässe...Der Kurt het mir no paar feini Friandise bracht. Uh, isch das es feins Bettmümpfeli gsy!
Ar Wiehnacht het der Pesche mit em R. abgmacht. Mir sy kurz nach den Achte in Wilderswil abgfahre, Richtig Lauperswil. Wo mir uf e Parkplatz si cho, isch s'R. grad mit ihrem Suhn gäge d'Chilche gloffe. Der Pesche het sech grad ihne chönne aaschliesse. Är isch bis am Abe bim R. gsy. Si het ihm zum Znacht no sys Lieblingsässe gmacht: Röschti mit Spiegeleier.
Mir si no go liege u uf di Eis zu M@i u Sabrina a d'Bläuer-Wiehnacht. Es si alli da gsy, üsi Kind u Kindeskinder. Es het es Fondue Chinoise ggäh. Das isch no öppis gäbigs, da chasch ässe was de magsch...Je nach de feine Sösseli, nimmsch de aube glych z'viel. Aber da bisch sälber d'Schuld! Der Kurt het mi nach üsere schöne Fyyr Hei gstellt u isch go der Pesche hole.
Am 26. isch der M. mit de zwöi jüngere Kids cho Zmittag ässe. Die si mega gwachse! Da s'ar Grandmaman nid so guet geit, si mir zu ihre go s'Kaffi näh. Si het letscht Wuche e Streifig gha, het sech aber fei guet erholt. Ussert dass si megafescht müed isch, merksch fasch nüt meh dervo.
Geschter han ig Wöschtag gha. I ha süsch nüt möge aarysse, nid e Mal use bin ig...
Hüt hei mir Bsuech zum Zmittag. Der Kurt het d'Osso Bucco scho im Ofe...Es git de Härdöpfustock derzue...