Am Sunndigmorge het der Kurt der Pesche gholt. Der Biber isch o ume i d'Ferie mitcho. Der Pesche het ne s'letscht Mal won er bi üs isch gsy mitgnoh gha.
Gäge Abe si du d'Manne is Schächli uf Bowil i Gottesdienst vor BPlus Konolfinge. Mir wär's z'Kalt gsy.
Am 20. het d'Sarah Geburtstag gha. Mir si mit ihre i Chrigu's Beck uf Burgdorf go brunche. Der Pesche isch überall gärn derby.
Am Mittwuch bin ig ume ir Pouse gsy u ha nächär Bsuech gha vor Palliativ Spitex Fachfrou. I syg die Patientin wo si am längschte begleiti u das syg für si es Wunder. Ja, i luege das o als Wunder aa. Hüt am Morge bin ig doch bir Schmärzärztin go bespräche wäge de Medi wo langsam aber sicher nümme so würke wi si sötte. Der Tumor ar Lunge isch gwachse u drückt mir mängisch d'Luft wäg...Es tuet mir äbe oft ar Lunge weh. Bestrahlig wo sötte d'Schmärze schwächer mache wott ig nümme. I läbe lieber u wott nid "dahin vegetiere"...
Plötzlech seit mir D'Ärztin "Öie Suhn singt schön!" Ihri Tochter het o am Thalirock Bass gspielt, drum het si ihn dört ghört. D'Wält isch scho chly!