Am Sunndig bin ig am Morge im Livestream z'Burgdorf ir BewegigPlus im Christleche Labeszäntrum gsy. Kurz nach em Mittag si mir mit em M@i abgfahre, nach Wilderswil. Dört hei mir uf em Parkplatz vom Hotel Alpeblick parkiert u sy uf e Bäreplatz a Wiehnachtsmarit. Es isch e härzige, chlyne Märit gsy mit öppe am ne Doze Märitständ mit sälber Baschtletem Ygkochtem u Gbachenem.
Der Alpeblick het uf syre Terrasse Tische dusse gha u Ouschtere mit Rosé Prosecco, es feins Steipilzrisotto mit Glüehwyy u no Bratwürscht mit Sänf verchouft. Es het fei e chly Lüt gha. Mir hei Ouschtere mit Prosecco u Risotto gha. My Maa het no ne Bratwurscht u Glüehwyy gha. Der M@i isch bis uf Konolfinge Hei gfahre.
Am Mändig han ig der ganz Tag nid viel gmacht ussert liegen u Fernsee luege u mit em Grandmaman telefoniere, zämezellt sy's sicher drüü Stund gsy. Am Abe si vier Fründe u Fründinne cho Panettone ässe. Mir hei das im Tessin gkouft gha ir Fyynbäckerei Da Monaco in Losone. Es isch mega fein gsy.
Geschter han ig näbscht em Liegen u Fernsee luege zwöi Maschine gwösche. Da chöme mir die Zyten i Sinn won ig nach em ne Lager Acht bis nes Doze Maschine gwösche ha. Da bin ig mir würklech als Wöschwyyb vorcho.
Am Namittag han ig dänkt, dass es schön wäri uf Lützelflüeh go z'bade. Das het mi um so meh gfröit, wo der Kurt mir uf sym Heiwäg aaglütte het u gfragt het öb ig mögi mit ihm go z'bade. Es isch ganz wohltuend gsy.
I ha nes Telefon gha mit der Palliativ Fachfrou u ha nächär ganzi 5 Minute gha um mi Laptop ufz'starte für i myni Pouse mit Livenet. I bi mau nid viu z'früeh gsy... Am Mittag isch gäbig gsy, dass der Kurt u der M@i uf em Heiwäg zum Chines si go z'Ässe poschte u hie si cho ässe. I ha Nudle gha mit Poulet. Mit es paar Löffle vor Sauce vom Kurt sym Äntegricht isch es super fein gsy. Ja, das git's gly nümm. Nudle vom Chines vo Willisou...