Am Mittwuch han ig e Termin gha bir Psychoonkologin. Si het gmeint, es sygi ungwohnt, dass ig als di Betroffeni am wenigste zu ihre chömi. Ja, i bi froh göh alli zu ihre. Es tuet's sowiso jedes vo myne Kinder anders verarbeite, di ganzi Situation. Si het vo hie u dört vo üsne Ufnahme ghört u gmeit, das syg de so nes Familiechörli. I ha ihre s'"Oh Happy Day" abgspielt u si het bym lose immer grösseri Ouge gmacht.
Si hät nid dänkt, dass es däwäg professionell isch...I ha du ihre di andere Stück o gschickt. Si isch beydruckt u het gmeint si heigi nie e settigen Yblick i ne Familie übercho wi jetz vo üs. I finde das e gueti Sach!
Am Donnstig Mittag het eini vo myne Cousine vo Bärn üs wölle zu sich ylade. I ha ihre gseit, dass es für mi gäbiger isch, bi üs z'Ässe. Si isch mit dere Bedingig zu üs cho, dass si darf s'Zmittag mitbringe. Si het e megafeini Lasagne gmacht u mitbracht. Mir si du nach em Ässe i Landblick zur Mamie u si het uuuu Fröid gha.
Statt am zwöi isch du d'D. am Füf vor Füfi cho u het mega Stress gha, dass si der Bus ume würd verpasse. Si isch für am Haubi Sächsy am Bahnhof z'sy am Zäh ab Füfi scho ume los gloffe.
Geschter han ig gwüsst, dass mir zum Znacht yglade sy. Drum bin ig meh oder weniger der ganz Tag am liege gsy.
Hüt isch es für mi gäbiger gsy. Der David isch mit de zwöi Kiddies cho. I ha mit der Jael Memory gspiel. Si isch ganz e gueti beobachtere. Si hei üs ghulfe üsi Räschte vor feine Lasagne u vo myne Poulet-Flügeli z'ässe.
I ha Hüt e wunderschöne Struss vo mym Schatz übercho.
Hinecht singt der Freddy Washington im Grabeguet. I ha ja Hüt mit myne vier Tochter u Schwiegertöchtere uf Thun a Wiehnachtsmärit u aaschliessend is Grabeguet. Es hei fasch alli irgendwie mit Verkältige z'tüeh, sodass ig's scho Geschter abgseit ha. I ha Hüt e Pyji Tag gha u ha's du Hinecht o grad la sy...