Am 25.11.2022 isch d'Flavia 30 jährig worde. I ha's knapp gschaft go z'gratuliere. Eigetlech han ig nächär no uf e Chonufinger Wiehnachtsmärit wölle. Das han ig aber nid gschafft. I bi wie ne toti Flöige uf d'Polstergruppe gheit u der Kurt het gly mit mir Hei müesse. Obwohl mir Bsuech gha hätte, bin ig uf mys "Tages" Bett gheit u yygschlafe. Wo der Bsuech scho Hei gangen isch gsy, het mi der Kurt gweckt u mi dra erinneret, dass ig myni Medis sött näh. I ha se gnoh u bi ufen is Bett. I ha guet gschlafen u ha mi am Morge scho gly Mau uf e Wäg gmacht am Mamie go z'hälfe mit ihrne schöne Kleider. Mir hei in Gunten am Thunersee, im Parkhotel ihre 90. Geburtstag gfyyret. Es sy fasch alli cho won ig yyglade ha. Es isch es wunderschöns Fescht gsy. Uf em Bild gseht me d'Grandmaman am aastosse mit ihrne Änkle. Si liebe se alli! I ha das fescht organisiert, da d'Mamie gfunde het si wöll es Fescht mache wo ihri Verwandte zämechömi ohni müesse truurig z'si. Si wöll no alli gseh vor ihrer Beärdigung. Ja, das het mi motiviert. I ha tatsächlech der ganzi Tag möge. Am Sunndig u Geschter o no, han ig eifach chillet u ussert mit em Mamie telefoniere gar nüt gmacht. I hät gar nid möge. Ja, wenn's ihre längwylig isch, drückt si ufs Telefon u wählt myni Nummere wo scho dynnen isch...eh ja i bi ja da u wenn si mir d'Sach scho s'Dritte Mau verzellt, de hänke mir uf...I wirde das Mau vermisse!
Hüt züglet my Maa sys Büro i myni Stube...d'Bürorüüm vo d'Unde sy ab em 1.12.2022 frömdvermietet. Ja, i merke...das macht mit mir öppis...eh ja, ei Tag bin ig fit am andere Tag, ohni Power...het's ächt e zämehang mit üsere Situation?