I der Nacht vom Zischtig uf Geschter han ig wieder Mau, i weiss nümm wi mängisch gögget. I ha im Äcke e verhärtete Lymphknote u dä isch ir Nächi vom Vagus Närv. Je nachdäm wien ig bim Liege Druck druf gibe, cha das äbe Göggen uslöse. Das isch mir passiert nachdäm ig myni Medis gschlückt ha. Das Ynäh vo de Tablette het mi o no greizt gha. I ha also i der Nacht nid nume wäg em Närv Problem gha, sondern o no grad wäg em Entzug vom Morphium. Am Morge het's ersch ufghört nachdäm e Bekannte Ma u d'Mamie am Telefon für mi bättet hei. Am Namittag han ig uf Burgdorf zur C. chönne. Si het mir das erklärt vom Druck uf e Vagusnärv, het mi no am Thorax behandlet u het mir s'Ganze rächt chönne löse.
Hüt het d'Mamie ihre Nünzgischte Geburtstag chönne fyyre. Der Mäni u ig sy mit ihre im Tearoom vom Landblick go Zmittag ässse. Nachdäm mir bim Uhremacher u der Mäni ihre es nöis Uhrebändeli gkouft het, han ig ihn ume bir Mamie usglade. I bi nächär zur Coiffeuse. Si het mir di einti Syte ume gkürzt. D'Chemokruseli wott ig no bhalte.