Am Frittigabe sy mir nach em Fyrabe go bade u uf em Heiwäg im Talgrabe go Znacht ässe. Es isch mega fein gsy. Dört cha me währschaft Ämmitauänisch ässe.
Am Samstig hei mir e Guetschyn yyglöst won ig zum Geburtstag übercho ha. Dä hei mir grad mit Begleitig vo de grosszügige Gäber umgsetzt. Mir hei enang so viu z'verzelle gha, dass mir tatsächlech nid gmerkt hei wi d'Zyt umen isch. Mir sy tatsächlech bis am Vieri im Chrütz z'Schlosswil ghöcklet. U s'Ässe, für ne chlyni Portion...lueg uf em Biud...eh, hmm, der Kurt hiuft aube no gärn.
Geschter sy mir mit Thürs und am Pesche ir Markthalle im Bärau go brunche. Oh, isch das fein gsy! D'Buebe hei's gnosse, ir Kita eis zu eis Betreuig z'ha. Si sy zwöi Ching u zwöi Betreuerinne gsy...
Uf di Füfe sy mir uf Münsige go ne Chrankebsuech mache. Uf em Heiwäg hei mir doch es Hüngerli gha. Churz vor der Ample ar Tägertschistrass, het's linkerhand ar Mühletalstrass e Pizzeria "Da Carlos". I gloub, mir hei ume ne Portugies gfunde. I ha Hüt zum Zmittag no gnueg gha vo de Räschte won ig Hei gnoh ha. Mit üsem sälbergmachte Habanero-Palmöl-Mix isch myni Focaccia phänomenal guet gsy!
I ha Hüt niene häre möge, mache Blau...