Am Mändig han ig zur Psychologin chönne. Si het gmeint, das gäb's wenig, dass die vo Krebs betroffeni Person nid oder wenig zu ihre chöm u derfür ihri ganzi Sippe...mir hei's guet gha zäme. I ha mir ume eis chönne myni Not vor Seel rede...
Di ganzi Situation vo myre Sippe macht mir im Momänt meh Müeh als myni Krankheit. My Maa het ja syne Kinder müesse künde. Der Ältischt het grad sofort öppis gha u isch fristlos gange. D'Tochter wo sehr gschpürig isch u syt de Schueuzyt da schaffet, het sich lah Krank schrybe. Si wott uf kei Fall uf Willisau.
Es isch scho es paar Tag so, dass ig meh Müeh ha mit em Schnuufe. D'Ärztin meint, i söll meh Mo-Tröpfli näh. Si sy mir gester am Abe usgange. Während em Tag wett ig lieber keni näh. Si mache mi irgendwie plämpläm u no meh zitterig. Die Nacht han ig müesse abe go schlafe. I ha du es Tablettli mit Schnällwürkendem Mo gno u bi abe uf's Spitalbett go liege...Mir tuet öppis ir rächti Backe ungerem Ohr immer meh weh. Es chräschlet immer wieder i däm Ohr...Es tuet wi nen alte Radio...