Heihieiiei geit die Zyt schnäll verby...I ha mi i de letschte Täg fei e chly still gha. Am Sunndig han ig der GD im Netz verfolt u bi derfür am Vorabe go üsi Brutfüehrere lose. Si isch glernti Märlierzählerin u het mit drüü anderne Profis Märli verzellt. Es isch immer spannend, di Wahrheite u Wysheite druus z'näh. Mir sy nächär go Sushi u Momo ässe. Ir Oberstadt Burgdorf hei paar Tibeter vor zwe Mönet es Beizli uftah. Mir hei alli genau das übercho wo jedes gärn het. I ha roue Fisch u Alge- u süsch Salat übercho. der Kurt, es gmisch vo Tofu, Frücht, Alge u süsch no Gjätt wien är seit. D'B. het Momos, Sösseli u Salat a re italiänische Sauce gha u der M. het es Thontatar mit chly Salat gha. Es isch so feiiin gsy, chasch s'Bildli studiere...
Am Mändig Namittag bin ig mit em Kurt uf Thun go üses nöien Outo hole. Mir sy no s'Ersatzouto go uf Interlake bringe, dört wo der Kurt der Volvo vom David het chönne verchoufe. Mir hei jetz näbscht em Copen no ne Lexus, Hybrid, stärchere Motor als der Auris, wyssmetalisé, zwöi Jährig, mit 25.000 Kilometer. So richtig stolz sy mir druf!
Gester het mi d'Sarah zum Zahnarzt begleitet. I ha nume müesse d'Zähn reinige u ha Gott sei Dank kes Loch!
Hüt bin ig meh oder weniger der ganz Tag gläge. Zum ässe u telefoniere u öppe Mau ufs Hüsli z'gah, het's öppe chly ungerbroche. Am Fyrabe, isch my Maa mit mir uf Lützuflüeh is Solbad go schwadere. Es het mega guet tah! Di meischte Beize ungerwägs hei zue gha, drum sy mir Hei eis cho zieh. Jetz göh mir ungere...