Im Ougust sy's 28 Jahr gsy wo in Bigle, di nöi bouti Möbufabri isch eröffnet worde. Am letschte Frittig hei mir es Schlussässe gha. D'Möbufabrik Bläuer AG züglet samt Büro uf Wilisou i di gross Fabrikationshalle vor Kasper Holding. Es wird o für mi angersch sy, wenn ig allei da ir Wohnig obe wirde liege u mir niemer meh us em Büro wird cho hälfe choche oder rüschte. Ja si sy am zügle u das macht mit üs allne öppis.
Am Frittignami sy der Kurt u ig uf Jegensdorf go der E. bsueche. Dä isch o scho Sächsi u geit i grosse Kindergarte. Sy Papa luegt byspielhaft zu ihm u syne zwe Schwöschtere.
Gester am Mittag hei mir mit em H. im Alpenblick Wilderswil zum Zmittag abgmacht. I bi froh gsy hei mir es Zimmer reserviert, de han ig chönne go liege. Am Abe han ig nume no nes Süppli möge.
Nach em feine Hotelzmorge u no kurzi Momänte mit der Familie Stöckli, sy mir mit em Copen Richtig Hettiswil gfahre. Mir sy dört zum Zmittag yglade gsy. Es isch mega fein gsy! Vor em Dessert bin ig uf d'Polstergruppe gläge. Gäg di Viere sy mir ume Daheime gsy. I ha bym Liege Fernseh gluegt. Z' ersch s'Fänster zum Sunndig zum Thema Burnout u nächär der Trickfilm Coco vom Walt Disney. Jetz weiss ig vo wo di Vorliebi bi de Junge für di Toteköpf chunnt. Das isch vollkrass, dass me mit settigem uf d'Kinder losgeit. In Afrika würd me säge "na Dschudschu!" Das isch "Häxerei!"