Am Frittig sy mir am füfi z'Biglen abgfahre. Der Pascal het üs uf Bärn gstellt. Es isch nämlech gar ke Zug gfahre vo üs us...Dä Zug isch de bis a Genfer Flughafe gfahre. Mir sy früeh gnue dört gsy, dass ig ha chönne Assistänz verlange. Das isch super gsy. Da bin ig im Rollstuehl dür Hingetüürli als Erschti as Flugzüg gfahre worde. D'Sarah het als myni Begleitig o düre chönne. I bi sehr dankbar, dass es dä Dienscht git. I hät ächt Müeh gha das alle z'loufe. Mir hei im Flugzüg, zwe Plätz ir hingerschte Reihe übercho. Das isch o gäbig gsy, de het niemer gseh, dass ig d'Maske immer wieder abezoge ha u mys Chini gschützt ha. Mir sy um e Mittag um scho in Barcelona gsy. Dört hei mir scho Mau e Schock gha ab der 500 Meter länge Warteschlange für uf nes Taxi gsy isch. Mir sy du zum ne Bus Ystieg gange. Dä Bus het üs is Uniquartier bracht. Mir hei dört i re Beiz mit Ussezohne Zmittag ggässe, i ha ne Paella gnosse. Vo dört us hei mir es Taxi gno wo üs is Hotel bracht het. Dört sy mir grad als Erschts is Sprudelbad ghüpft. Es isch nid richtig gloffe. Vielecht hei mir o der Houptschalter nid gfunde...Es isch ömu schön warm gsy. Der Pool näbedraa isch mega kalt gsy. I ha nume myni Füess drinne abgküehlt. Am erschte Namittag hei mir grad Mal nüt gmacht ussert zäme braschte u derzue chillet. Am Abe sy mir grad näb em Hotel zum Mexikaner. Dört hei mir zum Caipirinha u am Moktail Mochitto e riise Portion Nachos mit Guacamole u Chäs übercho.
Zum Zmorge het mir es Caffè con Leche u nes Croissant glängt. D'Sarah het albe der früsch presstnig Orangesaft vorzoge. Mir hei Gott sei Dank gly Mau d'Doppudecker Tourismus Büsse gfunde u he dört e 48 Stunde Karte poschtet. Mit dene zwo Zirkle hei mir di wichtigschte Paläscht u Kirchene vor Stadt gseh. Am einte Tag di blaui u am nächschte, di roti Fahrt.
I bi froh, dass myni Tochter o nid so ne Shopping Tanten isch. Mir sy zwar über ne Märit. Dört sy aber di Riichen u schöne Spanier gsy. Es het mi tüecht, es heigi nid so viel Touris gha wie mir...Mir sy es paar Meter wyter äne i nes Beizli go Zmittag ässe. Dört ynne sy houptsächlech Yheimischi gsy... Vore bym Märit isch e fei e längi Warteschlange gsy für is vordere Beizli. Mir hei bym verbyloufe gmerkt, dass es us der glyyche Chuchi cho isch...Vore, tüür u 100 Meter s'Gässli ab, einiges billiger...
Am Abe , nachdäm mir einigi Stunde z’ersch am Pool u nächär im Zimmer chillet hei, han ig myni Muschle ggässe. D'Sarah het d'Languste vorzoge. Ja, es sy würklech beidi Gricht fein gsy.
Wo mir mit em Bus di Roti Zohne gfahre sy, hei mir s'Meer gseh. Ja, mir hei's nume gseh u sy nid e Mal a Strand. Schade! Barcelona isch würklech e Stadt mit grossartige Gebäude u starche Kontraste. A däm Tag wo mir di schöne u ryyche Spanier gseh hei isch üs ufgfalle, dass einigi Lüt i däm Quartier wo üses Hotel isch gsy, uf der Strass gläbt, d'Küder erläse u s'Bruuchbare i nes Ychoufswägeli glade hei.
Mir hei trotzdäm e gueti Zyt gha, hei ganz cooli Bars gfunde wo gueti Cock- u Moktails gmischlet hei. Der Ungerschied vo dene zwöi isch: Cocktail het Alkohol drynne, Mocktail nid.
D'Assistänz am Flughafe Gänf het mi, im Rollstuehl bis zur Rollträppe vo mym Zug gfahre. Es isch scho immer rächt wytläufig i dene Flughäfe. Es isch o z'Gänf super gsy a allne Warteschlange verby gfahre z'wärde u sogar dank däm, der früecher Zug verwütsch z'ha, SUPER!
Geschter han ig zwar Wöschtag gha, 'bi aber viel gläge ussert für mi C. Termin in Burgdorf. Da han ig der Copen gsattlet u bi häre gfahre u de o zrügg.
Am Abe sy der Kurt u ig ume mit em Copen uf Thun gfahre. Das Mal isch är beid Wäg gfahre. Mir sy bi H. u E. zum Znacht yglade gsy. Troffe hei mir üs im Atelier. Der Y. u syni Partnerin hei mir erscht nach em feine Znacht, ohni abgmacht z'ha am Quai troffe. Mir sy das Mal am Nüni go di Moderni Wasser u Liecht Show erläbe. D'E. het äxtra für mi es chlyses Drübei Stüehli mitgnoh. I bi rächt froh gsy drum.