Am Zischtig han ig e Fuessmassage nötig gha. I ha der M. aaglütte u si het spontan uf my spontan Wunsch greagiert u isch mir am Nami cho "Füessle". Das het ume sooo guet tah. Am Abe sy mir früeh is Bett. Gester han ig my Mittwuch ZoomMeeting gha. Es isch ume spannend gsy. Am Namittag han ig müesse uf Signau go Tageskarte für Morn hole. I ha mit em Copen d'Mamie gholt. Mir sy nächär z'ersch über d'Mutte, em Hasli, am Bärg hinger abe is Eggiwil, über Röthebach, Würzbrunne, am Matinsegg, Meieried, nidsy uf Bowil u hurti no uf Konufinge a d'Burgdorfstrass 10 go Turte ässe zum 20. ikut Geburtstag. Es hei dört um di 20 Froue u fasch es dotze Ching uf üs gwartet. Si hei alli e sooo Fröid gha han ig d'Mama mitgnoh. Si isch dört würklech für Vieli d'Mama. I ha se nächär nach em Füfi i Landblick tah wo si no grad rächtzittig zum Znacht aacho isch. I bi obwohl s'Outo gfahren isch, rächt K.O. gsy!
Hüt het si scho am Morge Bsuech übercho vo re liebe Fründin wo mit üs in Kamerun gsy isch. Bi mir het d'R. zum Znüni feini Gipfeli u veschiedeni Brötli bracht. Si het zwöi härzigi Tagesmeitschi mitbracht. Es isch nid so gäbig gsy: üsi Schwiegertochter het Nachtwach u bi ihne wird en Ärdsonde Wärmepumpi g'bort...das hudlet aube nume so...Drum isch si bi üs im Gästezimmer am pfuuse. Mir si du abe gö Wösch abnäh, da ig o der Putzfee gseit ha i fröii mi se ersch nächscht Wuche ume z'gseh.
Ja, i wirde fei verwöhnt. Morn flügen ig mit myre Tochter uf Barcelona. I hoffe, es göng alles guet. Mir müesse vor em 07.50 Uhr dört sy. Es längt nid mit em erschte Zug z'gah. Es muess üs öpper uf Bärn tue, uf e 05.34 Uhr Zug. D'Schmärzärztin het mir e Liste gschickt vo myne Medis mit Föteli u mänger Ungerschrift...i bi gspannt, öb si wäg de Medis e so öppis wei gseh...