Am Sunndig sy di Junge wo vo Griecheland zrüggcho sy cho s'Zmittag ässe. Zum Kaffi het D'Flavia d'Grandmaman gholt. Si het das Rambazamba richtig gnosse. Wo si Hei isch het si gmerkt, dass es si rächt bruucht het. Es het o mi mega gschluuchet.
Nach em Znacht het der Kurt der Pesche ume Hei tah. Di 10 Täg sy jetz extrem schnäll düre gsy.
Geschter hei mir am viertu ab Füfi in Thun by eim vo de viele Thai mit em Vreni abgmacht. Der Papi hets ryysig gfröit won är üs het gseh cho. D'Yvonne u d'Riccarda hei sech o no derzue gsellt. Am Siebni, sy mir alli zäme vis à vis vom Freiehof go s'Wasserspiel luege. Nach däm Spannend u Schöne Spektakel, sy mir no zum Italiener am Mühliplatz. Won er ghört het, dass öpper Geburtstag het, isch der Källner mit em ne Stück Torta della Nonna mit em Glitzer Glimm Stängeli druf derhär cho. O myni Espresso Glace mit Bailys isch fein gsy.
I bi froh gsy het der Kurt s'Outo is Schlossparking gstellt, so hei mir nid wyt gha. Nach ere kurze Strecki im gschlossne Outo, hei mir gly aaghaute u hei s'Dach ume uftah. Es isch gar nid Kalt gsy!