Geschter bin ig allei gsy mit em Pesche. Am Mittag han ig ihm sys lieblingsässe gkochet: Röschti mit Späck (i ha Schinke gnoh) u Spiegueier.
D'Sarah het mir dä luschtig Huet vo Griecheland bracht. Dä bruuchen ig de im Cabrio.
Am Abe het's nüme Sunne gha. Der Kurt het in Konolfingen e Sitzig gha wäg em Huus u de Wohnige vor BPlus. Är het gfunde, mir chönni ja is Bahnhöfli uf ihn go warte. Peschen u ig sy no mit offenem Dach abe gfahre. Zum Apéro "Suser mit Prosecco" sy mir dusse ghocket. Es het gly afa rägne. Da sy mir yne. Wo der Kurt isch cho, hei mir s'Znacht bstellt. D'Manne hei Lasagne bstellt u ig ha nes Gmüeställer mit "Poulet filets au Café de Paris" übercho. Es isch feiiin gsy, o s'Drinke! Mir hei du der Cabrio dört glah u sy mit em Kurt Hei. I ha nüm möge fahre u d'Räschte wo mir im Take Away Truckli hei dörfe Heinäh länge mit de Röschtiräschte grad zum Zmittag. I cha also jetz de go liege...