Am Sunndig het der Pesche zum R. dörfe. Der Kurt het ihn vor em GD is CBZ gstellt wo si nächär sy zämecho. Der Kurt isch uf Konolfinge i GD. I ha der Livestream vom CLZ Burgdorf gluegt. Am Mittag het mi der Kurt gholt für zu R. u G. Si hei üs scho lang Mau zu sich yglade. I ha o dört dörfe uf der Polstergruppe liege. Es isch schön gsy i üsi Gmeinsame Zyte yne z'luege. I ha no Fotoalbum gluegt. Der Kurt het mi nächär Hei gstellt u isch der Pesche ume go reiche. Mir hei no zäme Fernseh gluegt...
Am Mändig hei mir üs g'üebt im "non far niente" Das heisst, ussert ässe, trinke, lafere, liege u Fernseeluege hei der Peschen u ig am Mändig nid viu gmacht.
Geschter het der Pesche mit der A. dörfen uf Zollbrück fahre. Si tuet freiwillig, Tagewys zur Cafeteria vom Dalia luege. Är het dört mit em R. Zmittag ässe u isch nächär bi ihren Obe go Siesta mache. Nächär sy si ume Abe go Eile mit Weile spiele.
I ha Wöschtag u bi so Dankbar isch mir d'R. cho hälfe s'Zmittag choche. I bi süsch aube nach em Choche so müed, dass ig fasch nüt meh mag ässe. Am Namittag bin ig ume einisch zum Huusarzt. Mys Loch am Bei bruucht syni Zyt zum Heile. Won ig am 12. Septämber umgheit bi, han ig am Schynbei, d'Knochehut verletzt. Es het also unger der Knochehut e Blueterguss ggäh u dä bruucht syni Zyt um sech zrüggz'bilde. I muess zur Verletzig Sorg ha u se füecht bhalte, de chöng si besser verheile. I ha no Frage gha wäg myre Verstopfig. I söll das mit der Schmärzärztin aaluege u ihm nächär Bscheid gäh, was u wie gnützt heig. I finde's no guet han ig Spezialischte zur Sytte won ig uf Ougehöchi, unkompliziert cha mit ihne telefoniere oder maile. Das macht mys Lyde chly besser us z'halte...
Mir sy am Abe no mit em Pesche is Solbad. Das het üs allne guet tah!
O mit wenig z’tüeh geit d’Zyt so schnäll düre…