Am Mittwuchmorge bin ig ume i d'Pouse vo Livenet. Das het guet tah, e WUNDERbari Läbesgschicht z'ghöre u nächär mit Lüt usz'tuusche wo myni Gschicht nid kenne. De hei mir ganz normal ustuuschet u nid ume myni Krankheit im Mittupunkt gha, sondern das Ghörte.
Am Donnstig han ig Bsuech gha vo der K. Si isch mit mir hie blybe u het mir ghulfe verschiedenes z'mache won ig allei nume müehsam mache cha. Am Nami isch myni HushaltPerle da gsy. Si tuet syt Jaaaaahre s'Stoubsugere vo üsem ganze Huus, s'Glette u o s'Putze vo däm wo's nötig het übernäh.
O Gester bin ig nid us Huus. Di drüü Manne wo hie logiere tuen ig bym Zmorge ungerstütze. Zum Zmittag längen ihne paar Kaffee u den Einte no paar Zigis. Si sy sech gwöhnt all Stund e bis zu 10minütigi Roukpouse yz'lege. Si tüeh ja di ganzi Filter und Absugaalag vor Bude useschryysse. Da hie nüt meh produziert u d'Halle wytervermietet wird, isch das Ganze überflüssig worde. D'Möbufabrik Bläuer AG züglet bis im Novämber uf Willisou.
Der Pesche isch syt Gester ume da i de Ferie. Der Kurt isch ne go hole.
Hüt am Morge isch der David mit syne zwöi Kiddies kurz uf Bsuech cho. Si sy in Venedig-Playa i de Ferie gsy u hei schöni sowie verrägneti Tage gha. Es het ne aber guet tah am Meer z'sy.
Der Opa, siehe Fötteli, isch sech o cho zrüggmälde. Är isch in Äland gsy u het fasch nüm chönne ufhöre mit verzelle. Es muess also wunderschön sy dört.