I bi syt am Sunndig meh oder weniger nume no am Liege. D'Tumore hei mir so weh tah, dass ig am Mändig, sobald ig ha chönne, am Mobile Paliative Diescht aaglütte ha. D'Frau N. het mir du empfohle e Spiegu vo de Mittu gäge z'Schlächtsy ufz'boue u is Spital aa z'lüte. Myni Paliativ Ärztin het mir gly zrüggglütte u het mir empfohle, meh Morphin z'näh. D'Frou N. het mir du Gester am Nami nach der Sitzig mit der paliativ Ärztin aaglüte. Si sy beidi dranne gsy. I nime jetz fix meh Morphin.
I bi so froh, dass ig das Zimmer ha won ig düre Tag cha sy. De chan ig dür d'Nacht schlafe. I muess zwar mängisch uf, cha aber geng wieder yyschlafe.
Syt em Donnstigabe hei mir drü Zimmer beleit. Si sy cho di ganzi Absugi bir Fabrik useboue. Vorgester am Abe sy si uf Schönbüel go Bade. Gester isch der Kurt mit em R. u am ne Lieferant go s'Znacht ässe.
Hüt isch d'R. mit eim vo ihrne Tageskids zu mir cho. Si het mir am Samschti, vor üsere Reis scho Gmües bracht gha. Hüt het si näbscht em Wösch ufhänke, mir e Teil vom Gmües blanchiert. Am Elfi isch si go mys Mamie hole. Ja, es git nüt schlimmers als Dys Kind z'gseh Lyyde. Si wett mir gärn öppis abnäh. Das geit aber nid!