Die Wuche bin ig immer Müed gsy. Am Mändig han ig doch gwöschet. Es isch fei guet gange.
Am Zischtig han ig vor allem am Morge chönne liege. Am Nami bin ig hurti wäg gsy. I bi nächär gärn ume go liege.
Am Mittwuch Nachdäm ig am Morge gläge bi, han ig mit em Pesche abgmacht gha. I bi ihn go hole. Es het in Langnou grägnet. I ha mit ihm abgmacht, dass mir dür e Märit göh we's in Zäziwil nüm rägnet. Es het tatsächlech hurti ufghört. Mir hei zum Glück beidi e gueti Rägejaggen anne gha. De hei mir bis Hingere u wieder zrügg chönne loufe. Für üs ufz'wärme sy mir i Mosaikträff. Oh, es heisst ja jetz ikutträff, i muess mi dra gwöhne. I ha ihn du ume Hei tah. Mir hei abgmacht, dass är am 7.10. zu üs i d'Ferie darf cho. Der M. isch bi üs zum Znacht yglade gsy. Är cha nümm bi Bläuers schaffe.
Am Donnstig han ig mi müesse vom Mittwuch erhole. I ha nid e Mal i d'Lymphdrainage möge gah. Am Abe han ig plötzlech müesse erbräche. I bi nume no nes hüfeli Eländ gsy.
I ha gwüsst, dass ig am Frittig no vor em Hochzyt vo mym Näffe mit em Mamie zum Coiffeur muess. Am Frittimorge han ig ume göögge. I ha däm ke Beachtig gschänkt, ha duschet u bi zum Mamie. Es isch guet gange. Am haubi Sächsi het d'Mamie plötzlech nüm möge. Ihri Batterie isch total lähr gsy. Mir hei se du Hei gstellt u sy diräkt uf Konolfinge as Fescht. Mir hei's lang usghalte. Das Hochzyt isch würklech super gsy. Das isch voll uf di zwöi Hüratende zuegschnitte gsy.
Hüt am Morge han ig z'Gfüehl gha, es göng besser. Nachdäm ig myni Medis gnoh ha, sy si ume retour cho. Mir hei für Hüt Tageskarte gkouft u hei abgmacht mit R. u H. uf Zermatt z'fahre. Das hei mir o gmacht. I ha im Zug, no i mys Kräschelsäckli gögget. Vo denn aa, han ig nümme müesse. Am Mittag hei mir In Täsch portugiesisch ggässe. Es isch mir alles blybe. I bi aber fasch wi liecht narkotisiert gsy. I bi meega Müed gsy, dass ig im Zug fasch nume gschlafe ha. Im Äcke, ungerem rächte Ohr und uf em Chopf han ig weh. Im Äcke u am Gsycht sy's höchstwahrschynlech Tumore wo wieder grösser wärde.
Zrügg Daheime, bin ig sofort go liege. I ha nächär plötzlech doch der Drang gha, zu mym Blog z'luege.