Dä Gruess han ig i de letschte Täg mängisch ghört. Mir sy z'erscht in Italie u nächär no zwe Täge in Locarno gsy. Es isch immer chly öppis gloffe u vor allem hei mir chillet. Mängisch sy mir mit de Hüener is Bett, es heisst zur glyche Zyt wi si...Am Morge sy mir i jedem Hotel vo den erschte Gäst zum Zmorge gsy. Je nächer mir ar Schwyzer Gränze sy gsy, je besser sy d'Kaffi i de Restaurants worde. I de Hotels hei si's o in Minusio nid gschafft es richtigs Latte Macchiato z'mache. I eim vo de Hotels wo mir gsy sy, isch e Pakistaner Bsitzer gsy. Unger Anderem sy mir in Turin gsy. Es isch vo ihrne Loube här fasch es Bärn Feeling ufcho. Am Gardasee sy mir am längschte gsy. Dört het's sogar es Thermalbad gha. Mir sy zwöi Mal go baden und ig ha einisch en Öl u s'nächst Mal, e Fuessmassage gnosse. A eim Tag sy mir mit em Schiff go ne Türli mache u sy paar Dörfli wyter a ne Märit. Hesch weniger Italiänisch aus Dütsch ghört. Das het mir mit der Zyt fasch öppis ggäh.
In Locarno sy mir mit em ne Fründ go ässe. Är het s'einti Mal für im Senti z'ässe no grad e früechere Gschäftspartner uf Bsuech gha u mitgnoh. S'anderi Mal sy mir z'erscht zäme is Lido go bade, si aber wäg de viele Lüt gly use. Mir sy go Zvieri Poschte u sy nächär no go Fründe bsueche. Am Abe sy mir is Delta Camping Restaurant fein go ässe. Wi fasch jedes Mal wenn ig dört häre bi, han ig Muschle gnoh. Die sy albe sooo fein! Vor allem o di toastete Brotschnittli mit Chilli u olivenöl druffe wo's derzue git.
Am Sunndig sy mir, wi bym Härefahre übere Simplon Hei greiset. Das tüecht mi di Stressfreieri Route aus düre Gotthard...Mir hei niene Stou gha!