Zum fyyre vo üsne 35 Jahr Ehe, hei mir üsi Gschwüschterti i DeltaPark yyglade zum Thailändisch ässe. Es isch e wunderbare Abe gsy u mir hei's gnosse, das feine Ässe. Zwüsch'em Gebäude wo d'Thaichuchi isch und der Bar muess me uf Pflaschtersteine u Grien übere loufe. I ha plötzlech e Misstritt gmacht u bi würklech flach uf's Gsicht gheit. Gott sei Dankbin ig mit em Gsicht is Gras gfloge. Was weniger guet isch gsy, mis Schynbei isch voll uf e Randstei brätschet. Me het grad chönne zueluege wi's dick worden isch. Der Jonathan het grad sofort bättet. Es het trotzdäm e so gfürchig usgseh, dass si Begleiter grad e Krankewage hei lah cho. I bi z'erscht uf ne Rollstuehl vom Hotel gsetzt worde u der Kankewage isch gly cho. Es isch usgrächnet e jungi Bekannti vo Jonathan u Eli aus Pflegefachfrou derby gsy. Si het uf der Fahrt is Spital Thun näbscht em Usfrage wo derzue ghört o mit mir bättet. Es hei alli gfunde, das sygi sicher broche, i müessi sicher z'erscht is Röntge. Es isch für mi o nes Wunder, dass es ke Bruch isch!
Hüt bin ig zum Optiker myni Brülle go richte. Die het vom Gheie fei verboge gha. Är het's chönne, ohni dass es bricht.
Hüt am Namitag han ig e Talk gha über myni Läbessituation, bi de Seniore vor BPlus u EGW. Es isch guet gange.