Am letschte Sunndig isch üse jüngscht Änkel gsägnet worde. Üsi Kinder sy o alli gsägnet worde. Es isch es schöns Fescht gsy mit Brätlen im Wald ar Ämme.
I bi o dervo überzügt, dass d'Toufi öppis für Erwachseni isch oder ömu sicher für settigi wo's sälber wei. Jesus isch o als erwachsene touft worde u het syne Jünger der Uftrag gäh i d'Wält use z'gah u alli derzue rüefe Syni Jünger z'wärde u se z'toufe im Name vom Vater, vom Suhn u vom Heilige Geist. O der Johannnes der Täufer het d'Lüt zur Umkehr grüeft u het se touft. Cha de es Baby umkehre u Jünger sy?
I bi froh, dass bis jetz o üsi Änkle einisch sälber dörfe wähle, öb si Jünger wei wärde u sech lah toufe oder nid.
Die Wuche bin ig grad zwöi Mal go bade. I ha äuä Gester s'einte Bei z'fesch ar Massagedüüse gha. I ha e sooo weh, wenn ig ufstah...bis ig aaglüffe bi...Das Bei wott mi scho länger mängisch nid würklech trage...
Hüt am Nami bin ig mit em Cabrio ungerwägs gsy. I ha hurti uf Tägertschi müesse am P. go Schlüssle bringe. Uf der Gmeinsverwaltig vo Konolfinge han ig zwöi GA's müesse hole u bi nächär a ikut Träff. Er heisst ja jetz nüm MosaikTräff, sondern d'I. leitet jede Mittwuch vo 14 bis 17 Uhr, im Saal vor BewegungPlus ar Burgdorfstrass 10, der ikut Träff.
Am 16.30 Uhr sy zwöi Änkle zu üs cho. I bi so froh gsy hei si so schön zäme gspielt. Der Poppeli alias Kurt het ihne Znacht ggäh. I bi immer wieder ygschlafe...