Am Mittwuchmorge het üs d'R. ume z'Nüni bracht. Mir sy grad zäme i Zoom vor Livenetpouse. Es isch e chly ne längen Input gsy, sodass mir nume weni Zyt hei gha für en Ustuusch. Dä tüecht mi äbe grad so wichtig u spannend. I lerne ömu jedesmal öppis. Am Namittag bin ig bir Mamie verby. Si hei jetz nöi d'Andcht am Mittwuch. Das heisst: si muess sech entscheide wo si häre wott, i d'Andacht oder is ikut...si isch i d'Andacht...
I bi bis öppis nach de Viere ume Hei. D'Froue hei alli e sooo Fröid gha, dass ig ume eis bi cho yneluege. D'A. het es feins Dessert bracht gha wo ihri Tochter gmacht het und en anderi Syrischi Frou het e schoggi Goguhopf bracht. Si hei mir e Schale voll mit Hei ggäh. Mir hei Daheime no gschmatzt!
I ha am Donnstignamittag zur M. i ne Lympfdrainage dörfe. Das het mega guet tah. I bi aber vor u nächär di ganz Zyt gläge. I ha fei Rüggeweh...'ha s'Gfüeu, s'Morphin längt nüme würklech. Geschter bin ig am Morge im TimeOut gsy. I mag no nid e Haub Stund im Wasser hin u här loufe. Nach ere Viertu stund bin ig scho fix und foxi...I ha no ei Massage z'Guet gha, e so han ig mir mit Fröide en Öl-Massage gönnt. Si het's guet gmacht! Am Mittag hei mir üs im Löchlibad mit em ne Paar troffe. Är isch e Gschäftsfründ vom Kurt. Es isch megafein gsy. Mir göh sicher wieder dört go ässe. Der Kurt het am Drüü e Termin gha. Är het mi Hei gstellt u nächär ume gholt. Mir sy zäme uf Bärn gfahre. D'Sunne het ume füregluegt de hei mir mit offenem Dach chönne fahre. Daheime aacho sy mir spontan vo üsne Nachbar zum Znacht yglade worde. Si hei letscht Wuche es Buebli übercho. Dä isch e sooo härzig! Der Kurt het ne e gueti Halbstund gschösselet u der Chly hets u gnosse u het wytergschlafe bis er doch der Hunger gschpürt het. Da het nume no s'Mami chönne hälfe.
Hüt am Morge sy der H. u d'R. uf em Wäg i d'Ferie mit üs cho Zmörgele. Das het üs gfröit! Es nimmt langsam Form aa, üses Wohnen im Alter...mir machen üs Gedanke wie's mit üs wytergeit. Üsi Wohnig isch üs würklech z'gross mit ihrne 6,5 Zimmer...