Am samstig hei mir es Geburigschänk yglöst. Mit R. u H. uf's Stockhorn go brunsche. Das isch ganz schön gsy!
Am Sunndig hei mir üse 35.Hochzytstag gha. Scho am haubi Nüni sy mir mit em Copen gäge s'Oberland. Mir hei es Urdinkel Brot mitgnoh u hei mit der Schwöschter vom Kurt u ihrem Maa no es Kaffi gnoh. Nachdäm mir z'Interlake sy go loufe, sy mir ume zrügg i Alpenblick. Dört hei mir es feins Zmittag ggässe. I hät sölle e haubi Portion bstelle u ha mir d'Räschte la ypacke. Das het üs mit Pizza vor Sarah grad glängt zum Zmittag vo Gester.
I bi Gester s'erschte Mal ume im TimeOut gsy. Das het guet tah im Wasser z'loufe u i d'Sauna z'gah u o z'merke, dass mi paar Lüt vermisst hei. I bi berüehrt gsy z'ghöre, dass öpper sogar jede Tag für mi bättet. I bi sicher, dass i wäge dene vielne Gebät no da bi!
Hüt am Morge han ig Gmües grüschtet u blanchiert. I ha syder meh Schmärze i der Lunge. I ha sogar d'Fuesspfleg vo Hinecht müesse absäge. Zum Glück han ig am Nami Bsuech gha wo mir e gueti Fuessreflexzohnemassage gmacht het. I ha nächär ume uf's Hüsli chönne. Ja, das viele Morphium lähmt haut der Darm scho...