Wo mir scho ungerwägs si gsy richtig Süüde, isch d'Mäldig cho s'Konzert wärdi wäg der Kälti abgseit. Das wär im ne Hangar, am Flughafe vo Bex über d'Bühni.
S'Hotel hei mir scho buechet gha u hätte's eh müesse zahle...
In Bärn hei mir öppis glieferet u der Kurt het mi im Hotel abgsetzt u isch no zum ne Kund. I bi gärn häregläge, nach der Reis. 'Bi froh gsy, isch es nid sofort wytergange.
Der E. u d'K. hei üs derfür i nes Restaurant yglade wo mir gourmet ggässe hei. Uf em Fötteli gseht me der Dessertwage u myni Uswahl. Es isch alles so feiiin gsy!
Derfür han ig ir Nacht druf acht Mal, gfüehlt 100x ufmüesse. Es isch mir schwär ufgläge...
I ha einisch meh beschlossen am Abe nümme z'ässe. I wott doch chönne schlafe...
Eh, i tue ja nid jeden Abe gourmet ässe...
Uf em Heiwäg sy mir zur L. am Europaplatz go nes feins Kaffi trinke. Im Hotel het's wohl früsch gmahlne Kaffi ggäh abe mit Milchpulver derzue u das han ig nid chönne trinke. I weiss, i bi verwöhnt! U doch sägen ig, wenn ig das no darf ha, de nimen ig's dankbar aa u mache mir kes Schlächts Gwüsse. Mir wüsse vielmals nid, was mir für nes ryyse Glück hei i der Schwyz z'läbe. Danke, liebe HimmuVater!
Gester am Nami het der Kurt no müesse restaurierti Stüehl uf Wilderswil i Alpeblick bringe. Mir hei du d'Mamie us em Heim gholt u hei se mitgnoh zu Kaffi u Chueche. Da üse Bsuech am mittlere Nami isch gsy u mir denn ke Kaffi meh näh, we mir wei chönne schlafe, hei mir derzue Rosé Prosecco gno. Es isch e gmüetlechi Rundi gsy wo d'Yvonne u der Richie o churz hei chönne härehöckle.
Hüt hei mir ke Gottesdienscht. Am Drüü isch d'Chinder Chiubi.