Am 10. Ougust het my Schatz der Wächsu i sys 60. Läbensjahr guet überstande. Är het denn ganz normau gschaffet u mir hei im chlyne Kreis mit paar Fründen aagstosse vo a mym Geburi nid hei chönne cho.
Am 11. han ig e Ruhetag gha. Am Vorabe sy mir mit em Cabrio uf Thun gfahre. Der Kurt isch zum ne Kund u ig ha i dere Zyt im MiCasa der Möbu Fachmaa glücklech gmacht i däm ig ihm Griffli bracht ha.
Am 12. sy mir go Ychoufe und ig ha no ne Termin gha byr C. Am Abe sy mir nach em Rüschte vo 5 Kg Kabis, 1 Kg Gmüeszibele u 6 grosse Rüebli no für di letschte Sunnestrahle z'gseh i d'Mänziwilegg Eis go zieh.
Gester sy mir am Sächsi uf i d'Chuchi. My Schatz het ganz viel Fleisch mariniert u lang niedergaaret. Är het nächär Tischen u Bänk ufgstellt und ig ha Bsteck u Gschirr u Gäser zwäggmacht zum Abenäh. Am haubi Elfi han ig d'Mamie gholt. Si het's bis am haubi Vieri usghalte. Mir hei e Teil vo üsne langjährige Fründen yglade zum beidi Geburtstäg z'fyyre. We mir alli hätte wöllen ylade, de hätte mir äuä d'Espace Halle müesse miete...Uf em Bild, e Teil vom Gabetisch...
Wär hät das dänkt, dass ig syt myre Erkrankig no zwöi Geburtstäg ha dörfe fyyre. DAS ISCH ES WUNDER! Danke für alli Gebät. I bi öppis nach em Vieri uf e Liegistuehl gläge u bi grad ygschlafe. Nach em ne Powernap han ig no chly ghulfe zämeruume. Üse Jüngscht u Syni Frou hei o ghulfe u hei mi ufegschickt. D'I. isch no mit ihrer Tochter für nes Viertu Stündli cho. I bi aber denn scho uf mym Bett gläge...Mir sy früeh is Bett aber ig ha fasch all zwöi Stung uf müesse u ha zum Glück aube ume chönne yyschlafe. Es sy so viel schöni Ydrück gsy, dass ig die no ha müesse verarbeite.
Hüt isch ume e ganz schöne Allianzgottesdienscht gsy. Das heisst di drü evangelische Kirche vo Koufinge; di evangelisch reformierti Kirche, s'evangelische Gmeinschaftswärk u di evangelischi Feikirche BewegungPlus hei zäme gfyyret u nächär es Kanadisches Büffet gnosse. Mir sy du am zwöi ume Daheime gsy.