Nach seinem Willen soll unser Leib nämlich eine untrennbare Einheit sein, in der jeder einzelne Körperteil für den anderen da ist. Leidet ein Teil des Körpers, so leiden alle anderen mit, und wird ein Teil geehrt, freuen sich auch alle anderen. Ihr alle seid der eine Leib von Christus, und jeder Einzelne von euch gehört als ein Teil dazu.

Di ganzi Gmeind isch ufgstande u het mit mir bättet, nachdäm ig der Värs vom Sunndig vorgläse ha gha. Dä isch gsy: 

Offenbarung 21:4 (HFA)Er wird ihnen alle Tränen abwischen. Es wird keinen Tod mehr geben, kein Leid, keine Klage und keine Schmerzen; denn was einmal war, ist für immer vorbei. Uf die Zyt fröien ig mi: kener Schmärze meh...

D'Mamie hei mir uf Bigle zum Zmittag mitgno. Si het's gnosse ume eis da z'sy u vorhär, nach em Gottesdienscht nid müesse z'pressiere sondern i aller Rueh es Kaffi dörfe z'näh u mit den andere z'brichte. 

Am Abe und o am Mändig bin ig müed gsy u ha gar nüt möge mache ussert mi z'erhole...

Gester am Morge het d'R. ume s'Znüni bracht u isch no nes Momäntli da gsy. E Mitarbeiter vom Kurt isch denn o grad cho u het üs sys Leid klagt. Mir hei nüt anders gwüsst als mit ihm z'bätte. Üse Himmuvater söu o dört übernäh!

Am Nami bin ig im Spital bir Palliativärztin gsy. Nachdäm ig ihre myni Beschwärde dargleit ha, het si es Notfall Röntge verordnet. I ha grad abe i d'Radiologie chönne u bi nächär zu ihre zrügg für d'Uswärtig. Si het gseh, dass es ke Erguss meh ggäh het, d'Operation also glungen isch. Es sygi nüt wo me grad müessti behandle. D'Schmärze won ig uf der Lunge heigi u o d'Atemnot i der Nacht syge vom Tumor wo äuä gwachse syg. I bi froh, dass es ke Infekt isch u dass ig nüt zuesätzlech muess behandle.

Won ig Hei cho bi, het d'Laura uf mi gwartet. I ha so fröid a ihre! Si het vor bau 13 Jahr es paar Mönet bi üs gwohnt u isch denn mega schreg druf gsy. Si het nach ere bewegte Zyt ihre Wäg ume gfunde u isch win ig voll überzügt, dass Jesus der einzig Wäg zum Vater isch. Üse Himmuvater weiss, was er macht u laht üs der Frei Wille dä wäg z'gah won är üs empfielt oder en andere. Är het üs nie versproche, dass dä Wäg immer liecht wird sy. Aber ÄR VERSPRICHT ÜS IMMER BI ÜS Z'SY u das tuet guet, das z'wüsse!

Hüt het mi Schatz Geburtstag, der Kurt alias KUSCHI (was uf Hebräisch dunkuhüttige Maa heisst)Är seit är chöm sech mängisch so vor...I liebe ihn aber mit wysser Hut glych gaaanz fescht!

Am Morge het mi d'S. bsuecht u wunderschöni Rose bracht. Am Mittag sy mir Vieri gsy am Tisch. I gah jetz de um go liege...