Es louft so viel, dass ig öppe die gar nid nache mag. Das isch mir i de letschte vier Täg so gange.
Am 31. Juli isch es 46 Jahr won ig mit myre Ursprungsfamilie vo Kamerun i d'Schwyz greist bi. Mir sy mit der Sabena, über Brüssel gfloge. Es isch sehr en emotionali Reis gsy. I ha denn so ne falschi Sicht vor Schwyz gha wo paar Täg druf brutal zerschmätteret isch worde won ig i d'Schuel cho bi ar Schwarztorstrass in Bärn.
Am 1. Ougust hei mir Vier Fründe hie uf Bsuech gha. Es isch schön gsy. I ha mi vorhär i üsem Bedli erfrüscht...es isch öppe 32 u d'Luft 28 Grad. Der Kurt isch no meh gange...Mir hei zäme üsi Schwyz gfyyret. I bi stolz e Schwyzere z'sy. Vieli sy sech nid bewusst, was mir für Vorrächt hei i üsem Land z'wohne u z'läbe mit all dene viele Vorzüg wo mir hie hei.
Am 2. sy di langjährigi Sachbearbeitere vo Littoue wo i de letschte Jahre mit der Bude Bläuer z'tüeh het gha mit ihrem Suhn da gsy. Si sy mit em Flixbus vo Dütschland här cho, wo sy o uf Bsuech sy gsy. Der Kurt het vorhär no zum Optiker müesse. Mir sy o zäme vorhär go ässe. I bi du i Globus go nes Kaffi näh. Der Rafael wo uf em Fötteli isch het vor Jahre fasch es ganzes Jahr bi üs gwohnt. Es isch ihm denn nid guet gange. Er isch i de letschte Jahre si wäg
gange. Er isch Hüt dört im Restaurant Gschäftsfüehrer.
Geschter sy mir mit üsne Gäscht uf em Niederhorn u bi de Trummubachfäll gsy. S'Zmittag hei mir in Wilderswil ggässe. Am Abe sy der Kurt u der E. no is Bedli gange. Er het nächär es feins Znacht gmacht.