Mir, das heisst der Kurt u ig, sy sächs Täg im Tessin gsy. Wi scho anderi Mal sy mir in Minusio i de E-Rooms gsy. Da mir o dört d'Ticinocard z'guet hei, sy mir gratis mit em Bus uf Locarno oder sogar uf Ascona gfahre. SOuto hei mir bym Hotel am Schatte chönne lah.
Bi der Bus Station het's d'Jolly Bar wo mir aube häre sy. Der Kurt het de aube s'Outo gholt, wenn ig nid ha möge der Stutz ufe loufe.
Einisch sy mir in Locarno im ne Beizli am Apéröle gsy. Es het dört e so viel ggäh, dass mir nüt meh zum Znacht bruucht hei. Plötzlech isch es düschter worde. Wo mir byr Busstation sy aacho, het's afa rägne. Wo mir im Bus sigsy, het's richtig abeglährt. Wo mir usgstyge sy u i d'Jolybar gange sy, het's kurz uftah. Der Kurt het troche chönne go s'Outo hole. Won er wieder da isch gsy u mir schön am Schärme sy ghöcklet, het das tropisch wi us Küble abeglährt.. D'Kälnerin het so Fröid gha a mir. Si het mi du uf d'Syte gnoh u gseit, si heigi o Brustkräbs aber es göng ihre guet u si sygi ab em Samstig i de Ferie i ihrer Heimat. Si het mir no e Bibelspruch ggäh und ig ihre. Die Begägnig het mega guet tah!
Mir sy eigetlech wäge üsne Fründe is Tessin. Ä isch mit Lungekräbs wieder im Spital gläge. D'Ärzt hei Klartext gredt u ihm ussert 24/24 Surstoffynahm ke Therapie meh aabotte. Vor zwöi Jahre het är mir gseit gha, är syg Atheist. Ig söll ihm nid mit em Gloube cho. Gester hei mir ihn ir Reha Klinik woner härezüglet isch worde no bsuecht. Mir hei mit ihm über s'Gschänk wo Jesus üs git i däm Är a üsere Stell am Krütz gstorben isch damit mir nach em Tod chöi wyterläbe, we mir das Gschänk aanäh. Är het du gmeint, das wöll o Är gloube. Nachdäm mir ihn gfragt hei, öb mir dörfi, hei mir für ihn u syni Frou bättet. Üse Gott isch gross!