Am Sunndig sy mir i Gottesdienst vor BewegigPlus Konolfinge. Es isch e spannendi Predig gsy über üses Härz als Garte wo me öppedie muess jätte. Aber nächär sött me gueti Saat dry tue, süsch chunnt s'Gjätt no viel rasanter...Es isch schön gsy, spontan zum Zmittag yglade z'wärde. Gmüetlech u fein isches gsy!
Der Kurt het der Pesche ume i s'Bärau gfahre. Ja, syni Ferie sy i eim Chutt düre gsy! Schön hei mir's gha!
Um di Füfe sy mir du mir em Cabrio über d'Beatebuchtstrecki uf Wilderswil. Am Kurt syni Schwöschter us em Züribiet isch o scho mit ihrem Maa da gsy. Es isch en aagnähmen Abe gsy.
Am Mändig isch di ganzi Familie, ohni Usnahm im Oberland gsy. Zäme hei mir Abschied gnoh vo myre Schwiegermama. Si isch scho länger demänt gsy u so hei mir üs eigetlech scho länger vo ihre verabschiedet gha. Jetz isch es aber definitiv, mir gseh nid e Mal meh ihri Hülle. I bi so froh, d'Hoffnig dörfe z'ha, se im Himmel wieder dörfe z'gseh. Aaschliessend a di Abdankig sy mir i s'Alpstübli go Zmittag ässe. Es isch mega fein gsy, brätleti Bratwurst oder Steak mit Risotto u zum Dessert Himbeeri mit Nidle u derzue Haselnusschueche. I bi mit der Sarah u em Pascal öppis nach de Füfe nidsy. Es isch e so schön gsy dert Obe, dass di letschte ersch nach de Sächse abe cho sy. Am Abe sy mir mit der ganze Familie Stöckli, der andere Schwöschter, der Cousine u der Tante vom Kurt zum Koreaner go Znacht ässe. I ha o dört nid so möge u bi froh gsy, dass no anderi müed si gsy.
Gester si mir ume mit em Cabrio Hei. Übere Mittag isch es trotz Wind rächt heiss worden im Outo...
I ha der ganz Tag z'Gfüehl gha es sygi Mändig, dass ig sogar en Osteopathie Termin verpasst ha. Schad!
Hüt mahn ig näbst em Zmittag choche u Wösche gar nüt mache...I ha jetz doch gschribe...