Ändlech han ig die Nacht ume chönne schlafe ohni müessen erbräche. Für nach em Ygriff won ig ar Pleura(Lungefäll) gha ha hei si mir e PDA gleit. Das isch e Narkose wo si für ne gwüssi Gägend vom Rügge lege. Es wird schwierig, wenn das Gift nid ir Bluetbahn blybt sondern näbedüre i Rügge u use fliesst. Bis si mir's gloubt hei, dass ig glych Schmärze ha u öppis nid guet isch, het's mir e ryse Buggu im Rügge ggäh. Si hei mir du e Schmärzpumpi ar Infusion tah won ig zuesätzlech bi Bedarf ha chönne Morphin ynelah. I bi also ziemli wäg gsy...S'Penizillin won ig ha müesse ha für en Abbou vo däm ryse Büggu am Rügge het mym Mage gar nid passt. I ha's bis am letschte Mändig über d'Bluetbahn übercho. Si hei mir gseit es göng de besser, wenn ig's Daheime diräkt schlücke. Dem ischt nicht so gewesen...i ha jetz e Wuche lang erbroche...
I bi hüt am viertu vor Füfi erwachet u ha ändlech ume d'Chraft zum schrybe. Gester am Mittag hei zwöi Brüeder für mi bättet u der Kurt het o immer wieder tah. I bi so froh git's di Möglechkeit vom Gebät. Danke für alli Gebät wo für mi obsi sy! Es chunnt guet!