Es isch doch am Mändig, my Ytritt. I hätt Hüt am Nami uf Burgdorf müesse. Drum han ig gfragt, öb's nid möglech wär o am Mändig s'Gschpräch mit em Narkosearzt z'ha. So muess ig scho am Drü dört sy. I bi so froh, dass mi d'C. am Mändignami no im Spital chunnt cho behandle. Es het scho vor der letschte OP Wunder gwürkt...
Dä Ygriff isch doch grösser als ig gmeint ha gha. Der Spezialist het's am Kurt u mir öppe während 1,5 Stund läng u breit alles erklärt. Also, es geit drum mi rächt lang uf d'OP vorz'bereite u de drüü Löcher z'mache: eis für d'Kamera, eis für d'Instrumänte u eis für Bluet u Flüssigkeit ab z'lah. Der Operateur wird z'erscht d'Flüssigkeit ablah u nächär es Pulver zwüsche de Lungefäll u Bruschtfäll ströie wo ne sterili Entzündig sött verursache. Die würd bewürke, dass di Blätter zäme verchläbe u dür das sech ke Erguss meh bilde wird. I muess für das mindestens ei Wuche im Spital blybe.