Gester isch es immer schlimmer worde. I ha fasch ke Luft meh übercho. Am 11i han ig is Spital Burgdorf aaglütte u ha uf di Zwöi e Termin übercho. Der Kurt, my Schatz isch mitcho. Är het sogar yne dörfe, is Behandligszimmer u het mir im wahrschte Sinn vom Wort s'Händli gha... Myni Palliativ Ärztin isch o grad cho u het zwöi Studierendi derby gha. Si hei dörfe zueluege. I ha wi letsch Mal byr Punktion müesse uf em Schrage hocke u nes Tischli näbedraa stelle u mi druf abstütze. E so, dass my Rügge grundet isch gsy. Si het fyneri Nadle gno als vorgäh nämlech es Wenflon. Das sy die wo me für ne Infusion z'stecke bruucht. Also het's scho Mau bym Betäube weniger weh tah. Si het nächär bym Ablah immer wieder Pouse gmacht, wenn's het afa weh tue. Es sy 1,5 Litter usecho u das isch nid ganz alles gsy...Bym Usezieh vom Wenflon, het si o geng Pousene Gmacht. Das hingäge han ig fasch nid gschpürt. I ha ihre gseit, i häbi bi ihre no Mau häre, we's nötig würd...D'Lunge tuet mir immer no weh. Si tuet sech haut wieder ihre Platz näh u entfaltet sech u das tuet weh!
Hüt am Morge hei der Kurt u ig am Siebni Zmorge ggässe u si parat gsy für e Tag. Plötzlech het üsi Nichte aaglütte u gseit, dass s'Grosi grag vory für immer ygschlafe syg. Si isch no warm gsy. Ihri Pflegerin isch wi jede Morge zu ihre as Bett u het se begrüesst u kurz ihri Hand gha. Si isch nume öppis im Stübli go zwägmache u wo si zrüggcho isch, isch D'Martha Bläuer- Schuler, myni Schwiegermuetter gstorbe gsy. Si het sofort myni Schwägerin grüeft wo i de letschte Jahre täglech samt ihrer Familie, zu ihrem Mami gluegt het. Mir sy also sofort is Outo gstiege u uf Wilderswil gfahre. Es isch so ne schöne Tod, we me eifach ohni Kampf oder Chrampf cha gah. Das het sech s'Mami immer gwünscht. Der Kurt isch so froh, het är uf sys Härz glost u isch am Mittwuch no zu ihre. Der M@i isch ir Nächi gsy, am Greenfield. D'Sabrina isch ihn go hole u si sy sech zäme vom Grosi cho verabschiede. Der Kurt u ig sy is Artos go ne Bsuech mache. Dört aacho bin ig härzlech begrüesst worde vo re Fründin us alte Zyte. Mir hei am glychen Ort d'Stifti als Pflegerin FASRK gmacht. I ha o mega Fröid gha se Life z'gseh u nid nume im Netz. Won ig usecho bi isch der Kurt mit em A. u sym Rollstuehl verschwunde gsy. I ha du bis si zrüggcho sy, e gäbige Schatteplatz gha. Mir sy du i Alpeblick fein go Zmittag ässe. Nach em Ässe sy üsi Söhn mit ihrne Kinder cho. D'Flavia isch mit de Kinder bi mir ir Lounge vom Alpeblick blybe. I ha der Noé us em Outo gnoh u bi ganz stouz gsy, dass är nid grännet het. D'Kinder sy vom Richie o verwöhnt worde mit Glace u Torte. Ja, das isch s'Läbe: s'Urgrosi stirbt u d'Kinder fülle der Ruum mit Läbe.
Uf em Heiwäg sy mir is Parkhotel go reserviere für Grandmaman's 90ste Geburtstag. I bi gspannt, wär denn alles wird derby sy.
In Oberhofe het der Copen vor der Ample plötzlech ke Wank meh tah. Zwöi jungi Lüt hei üs ghulfe der Copen ab der Strass z'stosse. Der Kurt het gly druf öpper aaghalte wo nes Überbrückigskabel het gha. Won er het wölle d'Klemme häretue het er gmerkt, dass der Dechu vor Cherze nüm druf isch gsy. Won är ne druftah het, han ig chönne aalah. Eh ja, mir sy du chly später aber dankbar Heicho.
Im Momänt louft ir Espace Arena e Suufparty. E tönt wi aube ir Blüemlere, we si Dampf git u fahrt...