Gester am Morge isch das lang ersehnte Telefon vom Spital cho. Am Abe sy my Schatz u ig no hurti uf Wilderswil. Är isch kurz zu sym Mami. Es isch so truurig z’gseh wi öpper sech langsam vor Wält verabschiedet u nümme bi üs isch, obwohl si no da wär. Si isch tatsächlech zrügg is Chlychindalter u cha nümm rede.
I ha hüt am Morge am 11i e Termin uf em Notfall übercho gha. Dört hei mi en Ärztin wo uf Ultraschall spezialisiert isch, und ihren Assistänt ungersuecht. I weiss nümm wohär ig das gnoh ha, dass Kontrastmittel i's Spiel chäm. Uf all Fäll isch der Erguss e so gross, dass me ihn o so gseh het. Aaschliessend bin ig mit der Palliativ Ärztin ufen i ihres Besprächigszimmer. Si het mit mir d'Optionen aagluegt won ig ha. Di Einti wär doch gly Mau e Punktion lah z'mache u di anderi isch z'warte bis ig der Ygriff cha lah mache wo de schlussändlech d'Lungefäll Blätter sötte zämechläbe. Denn würde si d'Punktion mache wenn ig scho beduslet bi vor Narkose. I wett wenn möglech di zwöiti Option aapeile. I hoffe, i halti's bis denn us...I cha fasch nümm Stägen uf loufe u wenn ig abliege, de nimmt's mir fei e chly der Schnuuf.
I bi froh gsy, han ig no süsch mit der Ärztin chönne rede. Si versteit mi und i weiss, dass si ungerem Arztgheimnis steit. I ha ihren erloubt, mi bi der Psychoonkologische Fachfrou aaz'mälde. Rede tuet haut scho guet!
Der David het mi is Spital gfahre gha u d'T. isch mi dört cho hole. Mir si zäme i Kalchofe go Zmittag ässe. Si het mi nächär Hei gfahre u isch no nes Momäntli bi mir im Zimmer häreghöcklet. Es sy beidne d'Ouge zuegheit, drum isch si du zu sich Hei go liege und ig ha es Powernap gnoh...Jetz geit's ume...