Am Samstig sy mir um di 10i in Winterthur gsy. Bym Hotel hei mir dörfe s'Outo parkiere u si grad a Märit. Chuum dört aacho, hei zwöi Manne üs aaghoue, öb mir es Aalige heige. Si tüege gärn für d'Lüt bätte. Der Kurt het ihne gseit, i sygi stärbenskrank u är wett gärn, dass ig ume gsund wär. Si hei du bättet. Es isch nüt offesichtlechs passiert. Da hei si gfragt, öb si nomal für mi dörfti bätte. I ha ihne gseit, si dörfi gärn, i wüssi eifach, dass ig gsund wärdi. Mi Heiland heigi mir aber no nid gseit öb's hie sygi oder de bi IHM.
Es het mega feins Ässe gha. Was ig am liebschte ha gha sy Dodo. Das sy Kochbanane im Rote Öl brätlet. I ha sogar Foufou übercho mit ere feine Sauce. A eim Stand hei si für nes Healthcenter in Bekoko gsammlet. I ha uf ihrer Homepage gseh, dass si sech für jungi Müettere ysetze wo sowiso im Läbe ke Chance meh heige...Si tüe o i Kampagne i Schuele d'Kids ufkläre, so dass es weniger Teeniemamis gäb. Ja, das was mir scho vor bald vierzg Jahr a der afrikanische Mentalität gstört het, no Hüt es Problem isch. Si hei Fötteli vom Dorf ufgmacht gha u hei vor Primarschuel eis gha. I ha ihne du erkläst, dass mi Vater die Schuel boue heigi. Nach em Zmittag han ig nümme möge. Der Kurt isch mit mir is Hotel u mir hei, obwohl s'ersch eis isch gsy, dörfe s'Zimmer bezieh. Der Kurt isch zrügg uf e Märit u het's mit der Cousine, der Tante u ihrer Fründin fei Luschtig u spannend gha. I ha Kraft gsammlet fir d am Abe a nes Konzärt z'gha. Si het Valérie Ékoumé u het mit ihrne vier super Musiker e wunderbare Sound mit Lieder us Douala härebracht. I bi froh, bin ig go liege, de han ig chönne s'Konzärt gniesse. Es wäre nächär no zwöi Uftritte gsy. Der Kurt isch doch o müed gsy u isch mit mir is Hotel.
Nach em ne feine Zmorge si mir is Migros Fitness Zentrum Banane, im glyche Gebäude. S'Bad u s'Damfbad hei guet tah.
Am Zwölfi isch d'Tante i s'Hotel cho u gly druf abe het üs d'Cousine mit der Stretchlimusine abgholt. Si het alles ggäh...mir hei es Apéro dörfe näh u sy gmüetlech zu ihne Hei fahre. Dört het's es mega feins Mittagässe ggäh. Der Maa vor Cousine het üs du ume is Hotel gfahre. Nach ere Siesta, sy mir de
ume uf d'Piste. Das mal sy mir nid wyt vom Hotel i nes Restaurant go ne Ramazotti näh. Mir hei beidi tiptop guet gschlafe. Geschter am Morge sy mir nach em feine Zmorge ume is Ftnesscenter. Der Kurt het uf em Märit d'M. u ihre Maa troffe. Si hei üs zu Kaffee und Kuchen yyglade. Es isch total gmüetlech gsy. Nach däm schöne Träff, sy mir Hei gfahre.
Es isch guet ume Daheime z'sy.
I ha Hüt Wösch. Zum Zmittag hei mir es Beefsteak Tatar gha. Es isch mega gsy. Am Nami isch myni Fründin cho u het Ärdbeeri bracht. Si het se hüt am Morge ufgläse. Die si sooo fein! D'R. het mir no grag ei Wösch ufghänkt. I bi so müed gsy, dass mir d'Ouge zuegheit si. I ha kurz e Powernapp gno u ha nächär Blog gschrybe...