I ha's scho am Mändig gmerkt, myni Kräft löh nah. I weiss es isch scho viel gsy, di Konferenz u nächär di längi Reis is Tessin. I ha ja das e so wölle. Es isch so, dass ig s'Gfüehl ha der Erguss isch ume völler. Wenn ig Stäge ufe gah, de chumen ig mega is Schnuufe. O wenn ig abliege, de han ig z'ersch ke Luft...
Am Zischtig Nami bin ig i Landblick. I bi mit der Mamie is Kaffi u der Stephan isch mit em Aiden und em Even häre cho Zvieri näh. Es het dört feini Glace vor Lebensart, vor Wägmatte. Uh, d'Grandmaman het Föid gha ihri Ur-Änkle ume eis z'gseh.
Gester han ig ar Livenet Pouse teilgnoh. Das het mir wi immer guet tah! I bi sooo froh e Tochter vom Schöpfer vo dere Wält dörfe z'sy u z'wüsse, dass mi Name im Buech vom Läbe steit!
Am Nami bin ig i Mosaikträff. Es het mi gfröit so viel fröhlechi Froue u sogar drü Manne u ne Bueb dört z'träffe. I ha nach em haubi Vieri Hei müesse go liege. Der Kurt u ig si am haubi Sächsi bi Fründe yglade gsy. Es isch e gmüetlechen Abe gsy. Mir sy vor em Zähni im Bett gsy und ig ha tatsächlech chönne düreschlafe bis kurz vor em Sächsi. Das het mega guet tah!
Hüt am Morge han ig zu den Artischocke e Vinaigrette gmacht u ne Salatsauce für e Grüen Salat (Cicoria Verde) us em Tessin. Das isch sooo fein gsy! Zum Glück han ig no Couscous gha, de han ig das schnäll gmacht gha... Hüt han ig mit der Ärztin gredt wäg em Schnuufe wo mir Müeh macht. Si tuet myni Date a re Ultraschall Spezialistin gäh wo mir ab em Zischtigmorge sött kontaktiere. Es geit de drum mit em Lunge Chirurg z'luege, ob me de Erguss vor em Ygriff wo si wei mache muess läähre oder öb's de grad ir Narkose passiert. Mit däm Ygriff sött de s'Lungefäll zämechläbe u sech nümme fülle. I bi gspannt, wenn das sött über d'Bühni gah.