Am Mändig bin ig go bade u i d'Wellness. Das het mega guet tah! I bi erfrüscht Hei. Der R. isch o am Tisch ghöcklet, so sy mir z'füfte höch da gsy. Der Kurt het scho am Morge Gmües gschnitte u gwürzt u ne marinierte Schwynsbrate druf tah u s'Ganze i Ofe tah. Z'ersch ganz heiss u nächär bis am Mittag uf 120 Grad drynne glah. Es isch ganz fein gsy! D'Sarah het Stocki gmacht u ne feine Salat derzue ggäh. I bi so froh chan ig mi ir Chuchi abmälde u s'chunnt glych öppis feins uf e Tisch. Das isch es grosses Gschänk!
Am Namittag han ig s'Gfüehl gha, i söll mit em Mamie go nes Fährtli mache. Mir sy am Räge dervo gfahre bis vo allne Syte här schwarz u schwäri Wulke derhär cho sy. I ha s'Dach vom Copen im Stou vor ere Zugschranke chönne zue tue u ha vor der Tür vom ne Kaffee aaghalte. Mir sy vor em grosse Räge d'Ynne gsy u hei chönne zueluege wi's d'Usse us Chüble gschiffet het.
Wo der Räge nahglah het u mir e feini Glace hei ggässe gha, sy mir ume im Copen yygstyge. I ha s'Mamie Hei bracht u si isch glücklech gsy, sogar mit zuenigem Dach Copen gfahre z'sy.
Gester han ig ussert packe nid viel Los gha...
Hüt fahre mir uf Winti. Dört findet di jährlechi Mitarbeiterkonferänz vor BewegigPlus ir Arche statt. Es wär mir z'aasträngend gsy, di Reis z'mache u grad ar Konferänz teilz'näh. Es isch mir lieber, Hüt über Willisau z'fahre, dört mit mym Maa u zwöine Sühn z'Mittag z'ässe u nächär uf Winti z'fahre. De chöi mir Morn vor em Hotel uf e Bus u byr Arche usstyge. I fröie mi, nach Jahre wo's nid het chönne stattfinde, Lüt us anderne BPlus z'gseh won ig nume dört aatryffe. Morn reise d’Sarah, der Päscu, der M@i, d’Sabrina, der Sven, d’M. d’S. u der M. vor BPlus Konolfinge aa. I bi dankbar u fasch e chly stolz, immerhin füf Lütli us myre nächschte Verwahdschaft derby z’ha. D’Konferänzgeit bis am Frittigabe.
Denn reise der Kurt u ig grad wyter is Tessin. Dört isch s'Wuchenänd vo de offene Wygüeter...Mir träffen üs am Samstigmorge bym Zmorge mit R. u H. I fröie mi uf das Wuchenändi!
In Locarno wärde mir o d'S. u der R. träffe. Si plange druf, üs z'gseh. Das sy langjährigi Fründe wo mir jedes Mal dört bsueche. Es geit ihne nid so guet u das isch sicher, dass ihne üse Bsuech wird guet tueh. I bätte für si!
Am Mändig fahre mir de zrügg...bis denn...schöne Räschte u gueti Zyt...