Us lutter Müedi, han ig am Mittwuch d'Livenet Pouse u am Donnstig es Mittagässen in Bärn verpasst. I schlafe aube eifach yy, syg's bym Läse, bym Fernseh luege oder mängisch o bym Tefoniere zum Glück nid bym Outofahre. Es sy gloub di nöie Medis...I gibe's zue, si nütze scho. I ha tatsächlech weniger Schmärze. Am Frittig han ig zur C. i d'Osteopathie dörfe. I bi so froh, dass si mir um en Erguss ume cha d'Lymphe aktiviere e so, dass s'Wasser wo sech drum ume aagsammlet het cha abfliesse. Leider het sech der Erguss äuä wider gfüllt. I chume e so schnäll i s'Chyyche. I bi aber so dankbar, dass ig i der letschte Wuche nümm ha müesse gögge.
I ha im ne Sack Kleider gfunde won ig us mym Schaft usegnoh ha gha wüu si mir z'äng si gsy. Tiu göh mir ume u anderi wärde mir o gly gah...
Hüt isch ir BPlus Konolfinge der Sägnigsgottesdienscht gsy vo zwöine wunderbare junge Lüt. D'J. het mi gfragt gha, öb ig für si chönnti bätte. Das han ig sehr gärn gmacht. I kenne se scho lang u bätte wyter für si u ihri Familie. Es isch e schöne Gottesdienscht gsy. Der Sven, my Näffe het ne ganz guet moderiert.
Nach em GD si der Kurt u ig mit em ne befründete Ehepaar i d'Badi Grosshöchstette go Zmittag ässe. Es isch ganz guet u gmüetlech gsy, dass mir
d'Zyt voll vergässe hei. Nach ere Yskaffe Glace si mir doch Hei go Siesta mache.
Mir hei's nid so lang usghalte u si nach kurzer Zyt ume i Copen ghocket. Üses Ziu isch gsy: Restaurant zur Traube in Bleike. Es isch schön gsy z'Fahre u dört si mir am Schärme ghocket. Z'ersch hei mir nume öppis wölle trinke. Zum Wyy hei mir aber doch öppis z'ässe gnoh, nämlech eis Täller Roastbeef mit Salat. Bym Heifahre hei mir s'Dach müesse zue tue. Es het grägelet...
So, jetz muess ig doch go liege...i bi müeeed!